वॉशिंग्टन – करोना महामारीनंतर आता जगभरात मंकीपॉक्सचा प्रार्दुभाव वाढल्याने अनेक देशांनी चिंता व्यक्त केली आहे. यात अमेरिकेतही मंकीपॉक्सचा वाढता धोका लक्षात घेता आरोग्य आणीबाणी जाहीर करण्यात आली आहे. अमेरिकेत शुक्रवारी तब्बल 7 हजार 100 मंकीपॉक्सच्या नवीन रुग्णांची नोंद झाली आहे. यामुळे अमेरिकेच्या प्रशासनाच्या चिंतेत वाढ झाली आहे. प्रशासन हाय अलर्टवर असून योग्य उपाययोजना राबविण्यासाठी आरोग्य आणीबाणीचा निर्णय घेतला आहे.
अमेरिकेने गुरुवारी मंकीपॉक्स विषाणू संसर्गाला सार्वजनिक आरोग्य आणीबाणी घोषित केले आहे. या घोषणेमुळे मंकीपॉक्सचा सामना करण्यासाठी फेडरल निधी आणि संसाधनांचा वापर करण्यात मदत होणार आहे. आरोग्य सचिव झेवियर बेसेरा यांनी सांगितले की, आम्ही मंकीपॉक्स विषाणूचा सामना करण्यासाठी तयार आहोत. आम्ही अमेरिकेतील प्रत्येक नागरिकाला मंकीपॉक्स गांभीर्याने घेण्यास आणि या विषाणूचा सामना करण्यासाठी सर्वतोपरी प्रयत्न करण्याचे आवाहन करतो. यासाठी प्रशासन योग्य ती मदत करेल.
अमेरिकेमध्ये गुरुवारी 6 हजार 600 मंकीपॉक्स विषाणूचे रुग्ण आढळले आहेत. यामधील सर्वाधिक रुग्ण न्यूयॉर्कमधील आहेत. न्यूयॉर्कमध्ये एक चतुर्थांश रुग्णांची नोंद झाली आहे. आणखी रुग्णांनी नोंद होण्याची शक्यता वर्तवली जात आहे. या पार्श्वभूमीवर अमेरिकेमध्ये आरोग्य आणीबाणी लागू करण्यात आली आहे. ही आरोग्य आणीबाणी 90 दिवसांसाठी लागू करण्यात आली आहे. अमेरिकेमध्ये मंकीपॉक्स विषाणूचा सर्वाधिक उद्रेक न्यूयॉर्क आणि सॅनफ्रिन्सिस्कोमध्ये झाल्याचे आढळले आहे.
या आठवड्याच्या सुरुवातीला बिडेन प्रशासनाने फेडरल इमर्जन्सी मॅनेजमेंट एजन्सी आणि सेंटर फॉर डिसीज कंट्रोल अँड प्रिव्हेन्शनच्या उच्च अधिका-यांना मंकीपॉक्सचा सामना करण्यासाठी व्हाईट हाऊस समन्वयक म्हणून काम करण्यासाठी नियुक्त केले. दरम्यान, मंकीपॉक्स लसीच्या उपलब्धतेवर बिडेन प्रशासनाला टीकेचा सामना करावा लागत आहे. युनायटेड स्टेट्समध्ये अद्याप एकाही रुग्णाच्या मृत्यूची नोंद नाही. मात्र, इतर देशांमध्ये काही मृत्यूची नोंद झालेली आहे.
मंकीपॉक्सवर लवकरच “सीरम’ची लस
सीरम इन्स्टिट्यूटचे सीईओ अदार पूनावाला यांनी सांगितले की, लवकरच “मंकीपॉक्स’वर लस उपलब्ध होईल. त्यावर संशोधन सुरु आहे. गेल्या काही महिन्यांपासून मंकीपॉक्सचा विषाणू जगातील अनेक देशांमध्ये वेगाने पसरत आहे. आता भारतातही मंकीपॉक्स विषाणूची अनेक प्रकरणं समोर आली आहेत, अद्याप अनेक रुग्णांचा अहवाल येणे बाकी आहे. सीरमकडून लस तयार करण्याचे प्रयत्न सुरु आहेत. काही महिन्यांत लस उपलब्ध होईल, असा विश्वास त्यांनी व्यक्त केला.