Chhatrapati Sambhajinagar Lok Sabha Election 2024 –छत्रपती संभाजीनगरमध्ये अखेर महायुतीचा उमेदवार ठरला आहे. येथे शिवसेनेच्या वतीने मंत्री संदीपान भुमरे ( Sandipan Bhumre) यांना उमेदवारी जाहीर करण्यात आली आहे. यासंदर्भात शिवसेनेकडून अधिकृत पत्रकाद्वारे घोषणा करण्यात आली आहे. त्यामुळे या लोकसभा मतदारसंघात आता शिवसेना उद्धव बाळासाहेब ठाकरे पक्षाचे चंद्रकांत खैरेंविरुद्ध संदीपान भुमरे अशी थेट लढत होणार आहे. एका शिवसैनिकाविरुद्ध दुसरा शिवसैनिक अशी थेट लढत होणार आहे.
दरम्यान, शिवसेना-भाजप यांच्या युतीत हा मतदारसंघ नेहमी शिवसेनेकडे राहिलेला आहे. यावेळी मात्र भाजप कडून देखील या जागेवर आपला दावा सांगितला जात होता. केंद्रीय राज्यमंत्री भागवत कराड, कॅबिनेट मंत्री अतुल सावे हे देखील लोकसभेसाठी इच्छुक होते. त्यामुळे या जागेवर उमेदवाराची घोषणा करणे टाळले जात होते. तर महायुतीत तिढा देखील निर्माण झालेला होता. काही दिवसांपूर्वी केंद्रीय मंत्री अमित शहा यांची येथे सभा झाली होती. त्यावेळी त्यांनी येथून भाजपचा उमेदवार दिला जाणार असल्याचे संकेत दिले होते. मात्र अखेर सर्व चर्चांअंती आता संदीपान भुमरे यांच्या नावावर शिक्कामोर्तब केले आहे.
25 एप्रिल रोजी भरणार उमेदवारी अर्ज –
18 फेब्रुवारी रोजी छत्रपती संभाजीनगरच्या उमेदवारीबाबत एकनाथ शिंदे यांची एक महत्त्वाची बैठक झाली. या बैठकीतच संदीपान भुमरे यांच्या नावावर शिक्कामोर्तब करण्यात आले होते. या निर्णयानंतर आता संदिपान भुमरे यांनीदेखील तयारी चालू केली आहे. मिळालेल्या माहितीनुसार ते येत्या 25 एप्रिल रोजी मुख्यमंत्री एकनाथ शिंदे यांच्या उपस्थितीत उमेदवारी अर्ज भरणार आहेत.
तिरंगी लढत होणार –
छत्रपती संभाजीनगरात एमआयएमकडून विद्यमान खासदार इम्तियाज जलील यांना पुन्हा उमेदवारी जाहीर करण्यात आलेली आहे. तर वंचितकडून अफसर खान यांना संधी देण्यात आली आहे. त्यामुळे या जिल्ह्यात तिहेरी लढत होण्याची शक्यता वर्तविली जात आहे. यात विशेष करून भुमरे विरुद्ध खैरे व इम्तियाज जलील यांच्यात चांगलीच चुरशीची लढत होण्याची शक्यता वर्तविली जात आहे.
संदीपान भुमरे यांच्याबाबत…
छत्रपती संभाजीनगर जिल्ह्यातील पैठण तालुक्याचे संदीपान भुमरे हे आमदार आहे. ते मराठवाड्यातील शिवसेना नेते आहेत. शिवसेनेत फूट पडल्यानंतर त्यांनी उद्धव ठाकरे यांची साथ सोडत एकनाथ शिंदेंच्या शिवसेनेत सहभाग घेतला. सध्या एकनाथ शिंदे यांच्या नेतृत्वातील सरकारमध्ये रोजगार हमी आणि फलसंवर्धन मंत्रालयाचे मंत्री आहेत. पैठण विधानसभा मतदारसंघातून ते 1995, 1999, 2004, 2014 आणि 2019 असे सलग पाच वेळा विधानसभेवर निवडून आले आहेत. रेणुका देवी-शरद सहकारी साखर कारखाना, विहामांडवाचे चेरमन आहेत. तसेच त्यांनी संत एकनाथ सहकारी साखर कारखाना, पैठण येथे स्लिपबॉय म्हणून काम केले आहे.