सणासुदीच्या काळात सोनं खरेदी करणं शुभ मानल जात. यातच दिवाळी सण अवघ्या काही दिवसांवर येऊ ठेपल्याने ग्राहक सोनं खरेदीसाठी पसंती देत आहे. त्यामुळे जर तुम्हीही सोन्यात गुंतवणूक करण्याचा विचार करत असाल तर केंद्र सरकारकडून १०० % शुद्ध सोनं खरेदी करण्याची सुवर्ण संधी देण्यात आली आहे. यासाठी तुम्ही २५ ऑक्टोबर ते २९ ऑक्टोबरपर्यंत सॉवरेन गोल्ड बॉन्डमध्ये (गुंतवणूक करू शकता. त्या अंतर्गत सोने २४ कॅरेट खरेदीसाठी प्रति ग्रॅम ४१७५ रुपयांची किंमत निश्चित करण्यात आली आहे.
रिझर्व्ह बँकेने सॉवेरन गोल्ड खरेदीसाठी ऑनलाईन अर्ज करणाऱ्या ग्राहकांनासाठी डिजिटल पेमेंटमध्ये प्रति ग्रॅम सोन्यामागे ५० रुपयांची सूट दिली आहे. म्हणजेच डिजिटल पेमेंट करताना एक ग्रॅम सोन्यासाठी ४७१५ रुपये द्यावे लागतील. याच २४ कॅरेट १ ग्रॅम सोन्याची बाजार किंमत आज ४७८० रुपये इतकी आहे.
आर्थिक वर्ष २०२१ -२२ साठीच्या सॉवरेन गोल्ड बॉन्डच्या तिसऱ्या मालिकेअंतर्गत ऑक्टोबर २०२१ ते मार्च २०२२ दरम्यान ४ टप्प्यांत बॉन्ड जारी केले जातील. तर आर्थिक वर्ष २०२१-२२ मध्ये एकूण १० टप्प्यांत सॉवरेन गोल्ड बॉन्ड लाँच केले जातील. यापैकी, मे २०२१ ते सप्टेंबर २०२१ पर्यंत ६ टप्प्यांत सॉवरेन गोल्ड बॉन्ड सुरू करण्यात आले आहेत. आत्ताची सातवी मालिका आहे.
जसजसे सोन्याचे भाव वाढतात तसतसे सोने गुंतवणूकदारही वाढतात. मात्र हे व्यवहार कागदी आणि इलेक्ट्रॉनिक स्वरूपात आहेत. यामुळे तुम्हाला ते फिजिकल सोन्याप्रमाणे लॉकरमध्ये ठेवण्याचा खर्चही सहन करावा लागणार नाही. हे सोने बँका, पोस्ट ऑफिस, एनएसई आणि बीएसई व्यतिरिक्त स्टॉक होल्डिंग कॉर्पोरेशन ऑफ इंडिया लिमिटेडद्वारे विकले जाते.
आरबीआयने देशात २०१५ पासून सॉवरेन गोल्ड बॉन्डमध्ये गुंतवणूक करण्याचा पर्याय उपलब्ध झाला आहे. सॉवरेन गोल्ड बॉन्डमध्ये किमान एक ग्रॅम सोने खरेदी करता येते. म्हणजेच तुम्ही किमान ४७१५ रुपयांचे सोने खरेदी करू शकता. गुंतवणूकदार ते ऑनलाइन किंवा रोखीने खरेदी करू शकते त्याबदल्यात सममूल्याचे सॉवरेन गोल्ड बॉन्ड जारी केले जातात. त्याचा मुदतपूर्ती कालावधी आठ वर्षांचा असतो. पण पाच वर्षांनंतर बाहेर पडण्याची संधी दिली जाते. थेट दुकानात जाऊन सोन्याची खरेदी कमी करण्यासाठी ही योजना सुरू करण्यात आली आहे.
सॉवरेन गोल्ड बॉन्डमध्ये वार्षिक २.५ टक्के व्याज उपलब्ध आहे. गोल्ड बॉन्डमध्ये किमान एक ग्रॅम सोन्याची गुंतवणूक केली जाऊ शकते आणि सामान्य माणसासाठी कमाल गुंतवणुकीची मर्यादा ४ किलो आहे. तर हिंदू अविभक्त कुटुंबासाठी (HUF) ४ किलो आणि ट्रस्ट २० किलोची मर्यादा आहे. गेल्या काही वर्षांत गोल्ड बॉन्डमध्ये लोकांची आवड वाढली आहे.
गोल्ड बॉन्डचा उद्देश भौतिक सोन्याची मागणी कमी करणे हा आहे, म्हणजेच लोक दागिन्यांऐवजी सोन्याचे रोखे खरेदी करतात. फिजिकल सोन्यापेक्षा गोल्ड बॉण्ड्स व्यवस्थापित करणे सोपे आणि सुरक्षित आहे. सरकारी गोल्ड बॉन्डची किंमत बाजारात चालू असलेल्या सोन्याच्या दरापेक्षा कमी आहे.
