न्यूयॉर्क : टायटॅनिक जहाजाचे अवशेष पहायला गेलेल्या पाकिस्तानच्या अब्जाधीशांचे सबमर्सिबल बेपत्ता होऊन आता बरेच तास उलटले आहेत. मात्र, अजूनही हे सर्व पर्यटक जिवंत असल्याची शक्यता वर्तवण्यात येत आहे. कॅनडाच्या रेस्क्यू टीमने पाण्याखालून दर अर्ध्या तासाने काहीतरी ठोकल्याचा आवाज येत असल्याची माहिती दिली आहे. यामुळे आता आणखी वेगाने त्यांचा शोध सुरू करण्यात आला आहे.
ओशियन गेट या पर्यटन कंपनीच्या एका छोट्या पाणबुडीमधून पाच अब्जाधीश बुडालेल्या ऐतिहासिक टायटॅनिक जहाजाचे अवशेष पाहायला गेले होते. रविवारी टायटन या सबमर्सिबल मधून हे अटलांटिक महासागराच्या तळाशी जात होते. मात्र, काही तांत्रिक बिघाडामुळे या पाणबुडीचा आणि त्यासह त्यातील सर्वांचा संपर्क तुटला. यानंतर बेपत्ता झालेल्या या सर्वांचा शोध सुरू करण्यात आला होता. या लोकांकडे अवघ्या काही तासांचा ऑक्सिजन शिल्लक होता. त्यामुळे मंगळवारी या सर्वांच्या जिवंत असल्याची आशा कमी झाली होती. मात्र, रेस्क्यू टीममधील काही लोकांना यावेळी पाण्याखालून काहीतरी ठोकल्याचा आवाज येत असल्याचे सांगण्यात आले आहे.
दर अर्ध्या तासांनी याठिकाणी काहीतरी ठोकल्याचा आवाज येत होता, असे पी-८ एअरक्राफ्टमधील टीमने सांगितले. यानंतर याठिकाणी आणखी एक सोनार टीम दाखल झाली, आणि तेव्हा देखील हा आवाज येतच होता.
अमेरिकेच्या होमलँड सिक्युरिटी अधिकाऱ्यांनी पाठवलेल्या एका ईमेलमध्ये ही माहिती देण्यात आली आहे. रोलिंग स्टोन मॅगझीनने याबाबत वृत्त प्रसिद्ध केलं आहे. यासोबतच, सीएनएन या वृत्तवाहिनीने देखील या वृत्ताला दुजोरा दिला आहे. हा आवाज कशामुळे येत आहे याबाबत स्पष्टता नसली, तरी या पाणबुडीतील लोक मदतीसाठी कदाचित हा आवाज करत असावेत असा अंदाज व्यक्त करण्यात येतोय. या पाणबुडीचा शोध घेण्यासाठी अमेरिका, कॅनडा या देशांची नौदलं, अमेरिकेच्या सरकारी एजन्सी, आणि खासगी समुद्र पर्यटन कंपन्या संयुक्तपणे काम करत आहेत.