नवी दिल्ली – ई कॉमर्स क्षेत्रातील अग्रगण्य ऍमेझॉन कंपनीने भारतात पुढील पाच वर्षात तंत्रज्ञान, पायाभूत सुविधा, आणि लॉजिस्टीक नेटवर्क मध्ये गुंतवणूक करून या देशातील दहा लाख लोकांना रोजगार पुरवण्याचे उद्दीष्ठ ठरवले आहे. गेल्या सात वर्षात ऍमेझॉनने भारतातील गुंतवणुकीद्वारे देशात सात लाख लोकांना नोकऱ्या मिळवून दिल्या आहेत. त्या व्यतिरिक्त या नवीन दहा लाख नोकऱ्या असणार आहेत.
कंपनीच्यावतीने जारी करण्यात आलेल्या एका निवेदनात ही माहिती देण्यात आली आहे. त्यांनी म्हटले आहे की आमच्या या पुढाकारामुळे आणि गुंतवणुकीमुळे माहिती तंत्रज्ञान, स्कील डेव्लपमेंट, कंटेन्ट क्रिएशन, रिटेल, लॉजिस्टीक आणि मॅन्यु फॅक्चरींग क्षेत्रात प्रत्यक्ष किंवा अप्रत्यक्षपणे सन 2025 पर्यंत किमान दहा लाख नवीन रोजगार निर्माण होतील.या कंपनीचे प्रमुख जेफ बेझोस यांनी बुधवारी ऍमेझॉन कंपनी तर्फे भारतात सुमारे सात हजार कोटी रूपयांची गुंतवणूक करण्याची घोषणा केली आहे. भारताने स्कील डेव्हलपमेंटला प्राधान्य देऊन विविध उद्योग क्षेत्रात येत्या दोन वर्षात 400 दशलक्ष लोकांना रोजगार देण्याची योजना आखली आहे. त्यांच्या या योंजनेला आम्ही यानिमीत्त हातभार लावत आहोत असेही कंपनीने आपल्या निवेदनात नमूद केले आहे.