कोपरगाव – तालुक्यातील शिंगणापूर येथील संजीवनी अभियांत्रिकी महाविद्यालयात द्वितीय वर्षात शिकणाऱ्या हेल्पचर ग्रुप विद्यार्थ्यांनी मॅनेजिंग ट्रस्टी अमित कोल्हे यांच्या मार्गदर्शनाखाली जागतिक मानवी मूल्य अभ्यासक्रमांतर्गत लायन्स मूकबधिर विद्यालयास भेट देऊन त्यांची संपूर्ण दिवसाची दिनचर्या जाणून घेतली.
संजीवनी अभियांत्रीकी महाविद्यालयाचे डायरेक्टर डॉ. ए. जी. ठाकूर यांनी विद्यार्थ्यांना जागतिक मानवी मूल्य अभ्यासक्रमांबाबत प्रास्ताविकात माहिती दिली. मेकॅनिकल विभाग प्रमुख डॉ. पी. एम. पटारे यांनी मागील विविध प्रकल्पांचा आढावा देऊन मॅनेजिंग ट्रस्टी अमित कोल्हे विद्यार्थ्यांच्या भवितव्याबाबत सातत्याने काळजी घेत असल्याचे सांगितले. प्रा. एस. एस. राज यांच्या नेतृत्वाखाली नामदेव गिरमे, एकता आहेर, श्रद्धा देशमुख, सार्थक जोशी, प्रीती आगवन व प्रतीक आहेर विद्यार्थ्यांनी या प्रकल्पात सहभाग घेतला. मूकबधिर विद्यार्थ्यांचे समाज जीवन कसे आहे, ते नेमके कशाप्रकारे शिक्षण घेतात, याबाबत सर्व माहिती या विद्यार्थ्यांनी शालेय व्यवस्थापनाकडून जाणून घेतली.
लायन्स मूकबधिर विद्यालयाचे मुख्याध्यापक पवार, एन. बी. डुकरे, रमेश टिक्कल, गायकवाड, गवळी यांनी मूकबधिर विद्यार्थी हस्तकला, चित्रकला , लेखन याबरोबरच विविध कलागुणांत कसे निपुण आहे याची माहिती दिली. हेल्पचर ग्रुपच्या विद्यार्थ्यांनी या मूकबधिर विद्यार्थ्यांना बुद्धिबळ, लुडो, बॅडमिंटन, बॅट, चेंडू, शटल खेळाचे साहित्य देऊन अल्पोपहार दिला.