नवी दिल्ली – 2021 या वर्षात महागाई वाढण्याचा धोका असला तरी सर्व बाबींचा विचार करून व्याजदर कमी पातळीवर ठेवले जातील, असे अमेरिकेच्या फेडरल रिझर्व्हने म्हटल्यानंतर जागतिक बाजारात सोन्याच्या दरात वाढ झाली. त्यामुळे भारतीय सराफातही गुरुवारी सोने आणि चांदीच्या दरात भरीव वाढ नोंदली गेली.
सोन्याचे दर सध्या कमी पातळीवर असल्यामुळे खरेदी वाढल्यामुळे गेल्या तीन दिवसापासून सोन्याच्या दरात मापक वाढ होत होती. आज दिल्ली सराफात सोन्याचा दर 105 रुपयांनी वाढून 44,509 रुपये प्रति दहा ग्रॅम झाला. तयार चांदीचा दर 1,073 रुपयांनी उसळुन 67,364 रुपये प्रति किलो या पातळीवर गेला.
याबाबत मोतीलाल ओसवाल फायनान्शिअल सर्व्हिसेसचे उपाध्यक्ष नवनीत दमानिया यांनी सांगितले की, फेडरल रिझर्व्हच्या आश्वासनानंतर जागतिक बाजारात डॉलर कमकुवत होऊन सोन्याचे दर वाढले. त्याचा परिणाम भारतातील स्पॉट मार्केटवरही झाला. मात्र वायदे बाजारात सोन्याचे दर काही प्रमाणात कमी झाले असल्याचे दिसून आले. जागतिक बाजारात सोन्याचे दर 1,738 डॉलर प्रति औंस तर चांदीचे दर 26.36 डॉलर प्रति औंस या पातळीवर आहेत.
गेल्या वर्षी लॉक डाऊनमुळे सोन्याच्या दरात बरीच वाढ झाली होती. मात्र या वर्षी जागतिक आर्थिक परिस्थिती सुधारत असल्यामुळे सोन्याचे दर तुलनेने कमी पातळीवर आहेत.