चेन्नई : काँग्रेसचे जेष्ठ नेते तथा भारताचे माजी अर्थमंत्री पी चिदंबरम यांनी आज ट्विटरद्वारे भारतीय आयकर विभाग पक्षपाती कारवाई करीत असल्याचा आरोप केला. काल तामीळनाडू येथे सूत्रांकडून माहिती मिळाल्याचे सांगत आयकर विभागातर्फे निवडणूक भरारी पथकासह द्रविड मुनेत्र कळघम पक्षाच्या नेत्या कनिमोझी यांच्या निवासस्थानी धाड घालण्यात आली होती. या कारवाईनंतर आयकर विभागाच्या हाती काहीही न लागल्याने त्यांना रीकाम्या हाती परतावे लागल्याच्या बातम्या माध्यमांमध्ये प्रसिद्ध झाल्या होत्या.
माध्यमांमध्ये प्रसिद्ध झालेल्या बातम्यांचा हवाला देताना पी चिदंबरम यांनी आपल्या अधिकृत ट्विटर खात्याद्वारे, “केवळ विरोधी पक्षांच्या नेत्यांबाबतच आयकर विभागाला ‘टीप’ कशी काय मिळते?” असा प्रश्नउपस्थित करत आयकर विभागाच्या कारवाईला पक्षपाती ठरवले.
आपल्या आणखी एका ट्विटद्वारे चिदंबरम यांनी आयकर विभागावर थेट टीका करताना “२०१९ लोकसभा निवडणुका आयकर विभागाच्या हुकूमशाही व पक्षपाती कारवायांसाठी लक्षात ठेवलेल्या जातील.” असा संदेश लिहला आहे.