वॉशिंग्टन :- रशियासोबतच्या युद्धादरम्यान अमेरिकेने युक्रेनला क्लस्टर बॉम्ब देण्याचा निर्णय घेतला आहे. रॉयटर्स या वृत्तसंस्थेनुसार, शुक्रवारी रात्री उशिरापर्यंत याची घोषणा केली जाईल. युक्रेनला देण्यात येणाऱ्या शस्त्रास्त्र पॅकेजमध्ये क्लस्टर शस्त्रे असतील जी 155 मिमी हॉवित्झर तोफातून डागली जातील असे, अमेरिकन अधिकाऱ्यांनी सांगितले आहे.
न्यूयॉर्क टाइम्सच्या मते, राष्ट्राध्यक्ष जो बायडेन यांनी गेल्या आठवड्यात राष्ट्रीय सुरक्षा अधिकाऱ्यांची भेट घेतली. यादरम्यान परराष्ट्र मंत्री अँटोनी ब्लिंकन यांनी युक्रेनला क्लस्टर शस्त्रे देण्याची सूचना केली. 2008 मध्ये क्लस्टर बॉम्बवर बंदी घालण्यासाठी 108 देशांनी संयुक्त राष्ट्रांच्या करारावर स्वाक्षरी केली आहे. यामध्ये फ्रान्स आणि ब्रिटनसारख्या अमेरिकेच्या मित्र राष्ट्रांचा समावेश आहे.
“ह्युमन राइट्स वॉच’च्या (एचआरडब्लू) अहवालानुसार रशिया आणि युक्रेन हे दोन्ही देश युद्धात क्लस्टर बॉम्बचा वापर करत आहेत. 2022 मध्ये, युक्रेनने रशियाच्या ताब्यातील प्रदेशात क्लस्टर बॉम्ब फेकले. यामध्ये 8 निष्पाप नागरिकांचा बळी गेला होता.
एचआरडब्ल्यू अधिकारी मेरी वेरेहेम यांच्या मते, युद्धात क्लस्टर बॉम्बचा वापर अनेक निष्पाप लोकांचा बळी घेत आहे. खरं तर, रशिया, अमेरिका आणि युक्रेन या तिन्ही देशांनी क्लस्टर बॉम्बच्या वापरावर बंदी घालणाऱ्या 2008 च्या संयुक्त राष्ट्राच्या करारावर स्वाक्षरी केलेली नाही. झेलेन्स्की दीर्घ काळापासून अमेरिकेकडून क्लस्टर शस्त्रांची मागणी करत आहे. क्लस्टर बॉंम्बचा वापर करून ते रशियन सैनिकांचे तळ सहजपणे नष्ट करू शकतील, अशी झेलेन्स्की यांची धारणा आहे.
क्लस्टर बॉम्ब म्हणजे काय?
क्लस्टर बॉम्ब हे एक शस्त्र आहे जे हवेत सोडल्यावर अनेक छोटे बॉम्ब सोडतात. हे छोटे बॉम्ब सामान्य बॉम्बपेक्षा जास्त क्षेत्र प्रभावित करतात. ते धोकादायक मानले जातात, कारण मुख्य वॉरहेडमधून सोडलेली अनेक लहान स्फोटके उद्दिष्टाच्या आसपासच्या परिसरात नुकसान करतात. बहुतांश घटनांमध्ये सामान्य नागरिकही त्यांना बळी पडतात. ते फायटर प्लेनच्या माध्यमातून आकाशातून आणि तोफांच्या माध्यमातून जमिनीवरूनही डागता येतात.
आजूबाजूला पडलेली छोटी स्फोटके बॉम्बचा स्फोट झाल्यानंतर बराच वेळ पडून राहू शकतात. अशा परिस्थितीत युद्ध संपल्यानंतरही त्यांच्या तावडीत येऊन जीव गमवावा लागतो. क्लस्टर बॉम्ब शत्रू सैनिकांना मारण्यासाठी किंवा त्यांच्या वाहनांचे नुकसान करण्यासाठी वापरले जातात.