पिंपरी, दि. 20 – आगामी पिंपरी-चिंचवड महापालिकेच्या सार्वत्रिक निवडणुकीपूर्वी चिंचवड विधानसभेची पोटनिवडणूक होत आहे. त्यामुळे पालिका निवडणुकीपूर्वी होणाऱ्या या निवडणुकीकडे “लिटमस टेस्ट” म्हणून बघितले जात आहे. त्यामुळे ही पोटनिवडणूक बिनविरोध होण्याची शक्यता खूपच कमी आहे. तसेच अतिशय रंगतदार निवडणूक होण्याचा अंदाज राजकीय वतुर्ळात व्यक्त केला जात आहे. तर भाजपकडून चिंचवड विधानसभा मतदार संघाचे निवडणूक प्रमुख शंकर जगताप यांनाच उमेदवारी मिळण्याचे जवळपास निश्चित झाले आहे.
चिंचवड विधानसभेचे भाजपचे आमदार लक्ष्मण जगताप यांचे 3 जानेवारी रोजी निधन झाले. त्यानंतर अनपेक्षितपणे अवघ्या 15 दिवसांत केंद्रीय निवडणूक आयोगाने पोटनिवडणुकीचा कार्यक्रम जाहीर केला आहे. पोटनिवडणुकीचा कार्यक्रम जाहीर होताच शहरातील राजकीय वतुर्ळातून कोण उमेदवार असेल याची खलबते सुरू झाली आहे. या पोटनिवडणुकीसाठी दिवंगत आमदार लक्ष्मण जगताप यांचे बंधु शंकर जगताप यांना उमेदवारी मिळण्याची शक्यता असून ऐनवेळी आमदार जगताप यांच्या पत्नी अश्विनी जगताप यांनाही उमेदवारी मिळू शकते. तसेच भाजपचे माजी नगरसेवक चंद्रकांत नखाते यांनी तयारी सुरू केल्याचे चित्र आहे. तर विरोधी राष्ट्रवादी कॉंग्रेसकडून महापालिकेतील माजी विरोधी पक्षनेते नाना काटे, भाऊसाहेब भोईर, मोरेश्वर भोंडवे, माजी नगरसेविका माया बारणे, शिवसेनेचे राहुल कलाटे यांच्या नावाची चर्चा सुरू आहे. त्यामुळे ही पोटनिवडणूक चुरशीची होण्याचा अंदाज राजकीय वतुर्ळातून व्यक्त केला जात आहे.
आगामी महापालिकेत पुन्हा सत्ता मिळविण्यासाठी भाजपने “अबकी बार सौ पार”, असा नारा दिला असतानाच विरोधातील राष्ट्रवादी कॉंग्रेसनेही 100 प्लस नगरसेवकांचा नारा दिला आहे. त्यामुळे पालिकेत राष्ट्रवादीला सत्ता मिळवायची झाल्यास चिंचवड विधानसभा मतदार संघ बिनविरोध भाजपला देऊ नये, अशी काही स्थानिक नेत्यांची भावना आहे. निवडणूक लढविण्याबाबत त्या-त्या वेळची परिस्थिती बघून आम्ही योग्य तो निर्णय घेवू, हे राष्ट्रवादीचे नेते अजित पवार यांचे भाष्य बरेच काही सांगून जाते. यापूर्वी राज्यात 4 पोटनिवडणुका झाल्या. दिवंगत आमदारांच्या घरात उमेदवारी दिल्यास एक राजकीय सभ्यता म्हणून तिथे विरोधक उमेदवार देत नाहीत, असा प्रघात होता. मात्र, देगलूर, पंढरपूर, कोल्हापूर पोटनिवडणुकीत राष्ट्रवादी, कॉंग्रेसने भाजपला विनंती करूनही त्यांनी उमेदवार दिला. त्यामुळे राज्यातील राजकीय परिस्थिती पाहता चिंचवडची पोटनिवडणूक बिनविरोध होण्याची शक्यता धूसर होत आहे.
महत्त्वाचा मतदार संघ, निर्णायक मते
चिंचवड विधानसभा मतदार संघात 19 प्रभाग असून सर्वाधिक 57 नगरसेवक निवडून येतात. त्यामुळे आगामी महापालिका निवडणुकीच्या सत्तेचा सोपान हा चिंचवडमधून जात असल्याने चिंचवड विधानसभा मतदार संघ भाजप आणि राष्ट्रवादीसाठी अत्यंत महत्वाचा आहे. चिंचवडच्या निवडणुकीत पिंगळे गुरव, जुनी सांगवी, नवी सांगवी या पट्टयातील मते निर्णायक ठरतात. ही मते तीनही वेळेस निर्णायक ठरली होती. पहिल्यांदा अपक्ष आणि दोनवेळा भाजपकडून जिंकलेल्या जगताप यांना या भागातून मोठे मताधिक्य होते. भाजपकडून जगताप यांचे बंधू माजी नगरसेवक शंकर जगताप यांच्या नावावर शिक्कामोर्तब होण्याची शक्यता आहे. महाविकास आघाडी एकच उमेदवार देणार की स्वतंत्र लढणार हे पाहणे देखील औत्सुक्याचे ठरणार आहे.