इस्लामाबाद : पाकिस्तानच्या खैबर पख्तूनख्वा प्रांतात कुर्रममध्ये तहरीक-ए-तालिबान पाकिस्तानने पाकिस्तानी सैन्यावर हल्ला केलाय. या हल्ल्यात पाकिस्तान सैन्याच्या कॅप्टनसह 12 ते 15 जवानांचा मृत्यू झालाय.
याशिवाय अनेक सैनिक गंभीर जखमी झालेत. इतकंच नाही तर पाकिस्तान तालिबानच्या दहशतवाद्यांनी सैन्याच्या 63 जवानांचं अपहरणही केलंय.
बंदी घातलेली दहशतवादी संघटना तहरीक-ए-तालिबान पाकिस्तान विरोधात (पाकिस्तान तालिबान) सोमवारी एक मोहिम सुरू असताना पाकिस्तानी सैन्याला मोठं नुकसान झालं. या दरम्यान अनेक सैनिक मारले गेलेत. यात 28 बलूच रेजिमेंटचे कॅप्टन अब्दुल बासित यांचाही समावेश आहे. बासित पाक फ्रंटियर कॉर्प्स विंगच्या थाल स्काउट्समध्ये प्रतिनियुक्तीवर होते.
मागील काही दिवसांपूर्वीच तालिबानने पाकिस्तानला एक गंभीर इशारा दिला होता. तालिबानचा प्रवक्ता सुहैल शाहीन म्हणाला होता, तालिबान आणि अफगानिस्तानमध्ये चर्चेतून सामंज्यस करार करण्यासाठी मदत करण्यासाठी पाकिस्तानचं स्वागत आहे. मात्र,पाकिस्तान आम्हाला निर्देश देऊ शकत नाही किंवा त्यांचे विचार आमच्यावर लादू शकत नाही.