पुणे – राष्ट्रीय सुरक्षेच्या आवश्यकतांमुळे, विशेषतः दुर्गम भागात, वाढत्या जटीलतेसह अनेक आव्हानांचा सामना करावा लागेल. त्यामुळे त्यासाठी सज्ज रहा, असे आवाहन लष्करप्रमुख आणि दि बॉम्बे सॅपर्सचे कमांडंट मनोज पांडे यांनी केले.
पुण्यातील लष्करी अभियांत्रिकी महाविद्यालयात स्क्रॉल सादरीकरण आणि दीक्षांत समारंभादरम्यान अभियंता अधिकारी पदवी अभियांत्रिकी (ईओडीई) आणि तांत्रिक प्रवेश योजना अभ्यासक्रमांच्या अधिकाऱ्यांना पांडे यांनी संबोधित केले. राष्ट्रीय सुरक्षेच्या आव्हानांचा सामना करण्यासाठी, विद्यार्थी अधिकाऱ्यांनी नवीनतम प्रगतीची माहिती ठेवण्याचे आणि संबंधित अभियांत्रिकी शाखांमध्ये सर्वोत्तम अभियांत्रिकी पद्धतींचा समावेश करण्याचे पांडे यांनी आवाहन केले.
अभियंता अधिकारी पदवी अभियांत्रिकी (ई. ओ. डी. ई.) अभ्यासक्रम-१२५ आणि तांत्रिक प्रवेश योजना (टी. ई. एस.) अभ्यासक्रम-४० मधील एकूण ४६ लष्करी अधिकाऱ्यांनी त्यांचे अभ्यासक्रम सी. एम. ई. पुणे येथे यशस्वीरित्या पूर्ण केले आहेत.
३२ लष्करी अधिकाऱ्यांना सिव्हिल अभियांत्रिकीमध्ये बी. टेक पदवी, सात अधिकाऱ्यांना इलेक्ट्रिकल अभियांत्रिकीमध्ये बी. टेक पदवी आणि सात अधिकाऱ्यांना बी.टेक मेकॅनिकल अभियांत्रिकीमध्ये बी.टेक पदवी प्रदान करण्यात आली. वैयक्तिक शाखांमधील गुणवान विद्यार्थी अधिकाऱ्यांना लष्करप्रमुखांनी विविध पुरस्कार आणि चषकही प्रदान केले.
कॅप्टन मिश्रा,लेफ्टनंट व्यास यांना सुवर्ण
इ. ओ. डी. ई.-१२५ अभ्यासक्रमात प्रथम क्रमांक पटकावल्याबद्दल कॅप्टन नवजीत मिश्रा यांना प्रतिष्ठित सुवर्णपदक आणि लेफ्टनंट अंबर चतुर्वेदी आणि लेफ्टनंट सार्थक व्यास यांना अनुक्रमे सिव्हिल आणि मेकॅनिकल शाखेत प्रथम क्रमांक पटकावल्याबद्दल टी.ई.एस.-४० अभ्यासक्रमात सुवर्णपदक देण्यात आले. पदवीनंतर, हे अधिकारी सक्रिय लढाऊ अभियांत्रिकी कामे, लष्करी अभियांत्रिकी सेवा, सीमा रस्ते संघटना आणि राष्ट्र उभारणीच्या इतर कामांच्या प्रतिष्ठित बांधकाम प्रकल्पांमध्ये कार्यरत राहण्यासाठी संबंधित विभागांमध्ये जातील.