मुंबई – आपल्या सौंदर्याने अनेकांना घायाळ करणारी अभिनेत्री पूजा सावंत हे नाव आता कलाविश्वासाठी नवीन राहिलेलं नाही. मराठीप्रमाणेच हिंदी चित्रपटसृष्टीतही तिचं नाव बहरु लागलं आहे. त्यामुळे बऱ्याचवेळा ती चाहत्यांच्या चर्चेचा विषय ठरत असते. जंगली चित्रपटातून बॉलिवूडमध्ये पदार्पण करणाऱ्या पूजाविषयी सध्या चाहत्यांमध्ये मागील काही दिवसांपासून नवीन चर्चा जोर धरु लागली आहे. पूजाने गुपचूप साखरपुडा उरकल्याचे म्हंटले जात होते. अखेर यावर पूजाने मौन सोडले आहे.
काही दिवसांपुर्वी पूजाने इंस्टाग्रामवर तिचे काही ग्लॅमरस फोटो शेअर केले होते. या फोटोत ती खुपच सुंदर दिसत होती. मात्र या फोटोमध्ये पूजाच्या नेटकऱ्यांना एक अंगठी दिसली. यावरून तिचा साखरपुडा झाला असल्याच्या चर्चा सुरू झाल्या. मात्र यावर स्वत: पूजाने प्रतिक्रिया दिली आहे. एका मुलाखतीत तिने सांगितले की, “ असं काहीही नाही.मी अंगठी उजव्या हातात घातली आहे. माझा साखरपुडा झालेला नाही. ही बातमी मलाही खूप उशिरा कळली.” याचबरोबर “साखरपुडा करण्यासाठी आयुष्यात कोणीतरी हवं”, असंही ती म्हणाली. त्यामुळे अद्याप पूजाचा साखरपुडा झाला नसल्याचे स्पष्ट झाले आहे.
यापूर्वीही पूजाच्या अफेअरच्या चर्चा रंगल्या होत्या. दरम्यान, पूजाने आता गं बया’, ‘झकास’, ‘सतरंगी रे’, ‘दगडी चाळ’, ‘नीळकंठ मास्तर’ अशा अनेक मराठी चित्रपटात वैविध्यपूर्ण भूमिका साकारणारी आहे. लवकरच ती ‘मुसाफिरा’ या चित्रपटात दिसणार आहे.