मुंबई – आर्टिफिशिअल इंटेलिजन्सच्या (एआय) मदतीने 2 तरुणांनी तरुणींचा अश्लील व्हिडिओ तयार केल्याची संतापजनक घटना पालघरमध्ये घडली आहे. धक्कादायक बाब म्हणजे या प्रकरणातील दोन्ही आरोपी पोलीस अधिकाऱ्याची मुले आहेत. काही वर्षांपासून एआय तंत्रज्ञानाचा वापर झपाट्याने वाढला आहे. त्यात या तंत्रज्ञानाचा गैरवापरही तेवढाच वाढला आहे.
कहर म्हणजे पालघरमधील एका पोलीस अधिकाऱ्याच्या 2 मुलांनी एआय तंत्रज्ञानाच्या मदतीने 2 तरुणी व महिलांचे अश्लील व्हिडिओ तयार केले. ते एवढ्यावरच थांबले नाही. त्यांनी हे व्हिडिओ थेट सोशल मीडियावर शेअर केले. हा प्रकार समजल्यानंतर पीडित तरुणींनी आरोपींचा विरोध केला.
पण आरोपींनी शिरजोरी करत त्यांनाच मारहाण केली. त्यानंतर तरुणींनी थेट पोलिसांकडे धाव घेऊन आरोपींविरोधात तक्रार दाखल केली. त्यानंतर आरोपींच्या मुसक्या आवळण्यात आल्या. आर्टिफिशल इंटेलिजन्सच्या मदतीने अश्लील व्हिडिओ तयार करण्याची ही पहिलीच घटना घडली आहे.
आरोपींचे वय 19 व 21 वर्षे आहे. त्यांचे वडील मुंबई पोलिसांत कार्यरत आहेत, असे अर्नाळा सागरी पोलीस ठाण्याचे वरिष्ठ निरीक्षक कल्याण करपे यांनी याविषयी बोलताना सांगितले.