पुणे (संजय कडू ) : पुणे शहरातील गुन्हेगारांची नागपुर पॅटर्न स्टाईलने झाडाझडती आणि शाळा घेतल्यानंतर गुन्हेगारी नियंत्रणात राहिल अशी अपेक्षा आयुक्तालयात बसलेल्या वरिष्ठ अधिकाऱ्यांना होती. त्यांच्या देहबोलीतून तसा आत्मविश्वासही दिसत होता. मात्र मागील काही दिवसांत घडलेल्या घटना पहाता गुन्हेगारांवर पोलिसांचा वचक आहे की नाही? असा सवाल उपस्थित रहात आहे.
पोलिस आयुक्तालयात आर्म ॲक्टचे गुन्हे दाखल झालेल्यांची झाडाझती घेतल्यानंतर त्याच रात्री शिवाजीनगर पोलीस ठाण्याच्या हद्दीत बांधकाम व्यवसायीकावर ‘मुळशी पॅटर्न स्टाईनले’ हल्ला करण्याचा प्रयत्न झाला. त्यानंतर शहरात सुरु झालेले गोळीबाराचे सत्र थांबायचे नाव घेईना. शहरात सलग चौथ्या दिवशी गोळीबाराची घटना घडली आहे.
पुणे पोलिस आयुक्तलयाच्या आवारात शहरातील सर्व छोट्या मोठ्या टोळ्यांची हजेरी घेऊन त्यांना तंबी देण्यात आली होती. यानंतर अंमली पदार्थ विक्रीचे गुन्हे दाखल असणाऱ्यांची झाडाझडती घेण्यात आली. तर नुकतीच आर्म ॲक्टचे गुन्हे दाखल असलेल्यांची झाडाझडती घेतली गेली. तरीही गुन्हयाचा आलेख मात्र कमी होण्याचे नाव घेईना. कोयत्याचा वापर सर्रास गुन्हयामध्ये केला जात आहे. मंगळवारी दुपारी पावने दोन वाजता बांधकाम व्यवसायिकावर गोळीबाराचा प्रयत्न झाला.
बुधवारी सकाळी हडपसर येथे व्यवसायिक स्पर्धेतून एका माजी सैनिकाने दुसऱ्या माजी सैनिकावर गोळ्या झाडल्या. तर गुरुवारी पहाटे भुमकर चौक नऱ्हे येथे माचीस मागीतल्या कारणातून दोघांवर गोळीबार झाला. त्यानंतर आता येरवड्यात आता गोळीबाराचा प्रकार घडला आहे. आज (शुक्रवार) पहाटे तीन ते चार वाजताच्या सुमारास येरवडा येथील अग्रसेन शाळेसमोर एका तरुणावर गोळीबार करण्यात आला आहे. त्याच्यावर तीन गोळ्या झाडण्यात आल्या असून एक गोळी तरुणाला लागल्याची माहिती आहे. पूर्वीच्या वादातून हा प्रकार घडल्याचे समजते. विकी चंदाले असे गोळीबार झालेल्या तरुणाचे नाव आहे. तर आकाश चंदाले याने हा गोळीबार केलाय. पोलिसांनी दिलेला इशारा गुन्हेगारांनी गांभीर्यान घेतला नसल्याचे वरील घटनांवरुन दिसते.
– पब चालकांची शाळा रात्रीही सुरु –
पोलीस आयुक्तालयात गुन्हेगारांप्रमाणेच पब चालकांचीही शाळा घेण्यात आली. त्यांना दिलेली वेळ पाळण्याचे सांगण्यात आले तसेच पोलीस ठाण्यांच्या प्रभारी अधिकाऱ्यांनाही लक्ष ठेवण्यास सांगण्यात आले. मात्र खुद्द महापालिकेकडून तीन तीन तक्रार अर्ज देऊनही पबवर कारवाई झाली नाही. अखेर महापालिकेच्या अधिकाऱ्यांनी एका संयुक्त बैठकीत हा विषय काढल्यावर आयुक्तालयातूनच कारवाईसाठी पथक पाठवले गेले.
संबंधीत पब सील झाले तसेच महापालिकेनेही अतिक्रमण कारवाई केली. यानंतर तरी शहराती पब नियम आणि वेळ पाळतील अशी अपेक्षा होती. मात्र स्थानिक पोलिसांना हातीशी धरुन आयुक्तालयातील वरिष्ठ अधिकाऱ्यांच्या सूचनांना पबवाले जुमानेनात अशी घटना पुन्हा घडली. कल्याणीनगर येथील एक पबमध्ये वेळेचे बंधण धुडकावून मद्यविक्री सुरु असल्याने त्यावर उत्पादन शुल्क विभागाने कारवाई केली. मात्र याची कल्पनाची आयुक्तालयात बसलेल्या वरिष्ठांना नव्हती.