बेंगळूरू – पुढील वर्षी होणाऱ्या लोकसभा निवडणुकीत भारतीय जनता पक्षाचा मुकाबला करण्यासाठी सर्व पक्षांना एकत्र करण्यासाठी विरोधकांची दुसरी बैठक मंगळवारी (18 जुलै) बेंगळुरू येथे होत आहे. आज या बैठकीचा दुसरा दिवस असून, त्यात 26 विरोधी पक्षांना उपस्थित राहण्यासाठी निमंत्रण पाठवण्यात आले आहे.
दरम्यान या बैठकीला शरद पवार यांनी हजेरी लावली आहे. या बैठकी दरम्यान त्यांनी पोस्ट लिहत आपली भूमिका स्पष्ट केली आहे. शरद पावर यांनी फेसबुक पोस्टमध्ये लिहिले आहे की,’आज बेंगळूरू येथे विरोध पक्षांच्या बैठकीसाठी उपस्थित राहिलो . यावेळी काँग्रेस राष्ट्रीय अध्यक्ष खा. मल्लिकार्जुन खरगे, काँग्रेस नेते राहुल गांधी, पश्चिम बंगालच्या मुख्यमंत्री ममता बॅनर्जी, बिहारचे मुख्यमंत्री नितीश कुमार, माजी मुख्यमंत्री लालूप्रसाद यादव, दिल्लीचे मुख्यमंत्री अरविंद केजरीवाल, सिपीआय नेते सीताराम येचुरी, समाजवादी पक्षाचे राष्ट्रीय अध्यक्ष माजी मुख्यमंत्री अखिलेश यादव, अखिल भारतीय तृणमूल काँग्रेसचे नेते खा. डेरेक ओ ब्रायन आणि विविध विरोधी पक्षांच्या मान्यवरांसोबत भेटीगाठी झाल्या. यावेळी उपस्थित सर्व नेत्यांकडून एकत्र लढू आणि जिंकू असा निर्धार करण्यात आला.’