Sakshi Malik Retirement – कुस्तीपटूंच्या प्रश्नावर काँग्रेसने पत्रकार परिषद घेऊन केंद्र सरकारवर हल्लाबोल केला आहे. काँग्रेसचे प्रवक्ते रणदीप सुरजेवाला म्हणाले की, ‘मुलींच्या प्रतिष्ठेशी खेळले जात आहे. केंद्र सरकारने मुलींना न्याय दिला नाही. तसेच ब्रिजभूषण शरणसिंग यांना अटक करण्यात आली नाही. भाजपने सर्व क्रीडा संघटना काबीज केल्या आहेत.’
सुरजेवाला पुढे म्हणाले, ‘कुस्तीगीर मुलींच्या लैंगिक शोषणाचा आरोप असलेले भाजपचे खासदार ब्रिजभूषण सिंह यांचे निकटवर्तीय संजय सिंह यांच्या निवडीनंतर ऑलिम्पिक पदक जिंकणारी पहिली महिला कुस्तीपटू साक्षी मलिक यांची निवृत्ती हा भारताचा क्रीडा इतिहासातील काळा अध्याय आहे. शेतकऱ्याच्या पैलवान मुलीच्या डोळ्यातून येणारा प्रत्येक अश्रू मोदी सरकारच्या निर्लज्जपणाचा पुरावा देतो. भाजपचा नारा आहे,’तुमच्या मुलींना रडवा, तुमच्या मुलींना त्रास द्या आणि तुमच्या मुलींना घरी बसवा.’
‘पहिले ऑलिम्पिक पदक जिंकणाऱ्या हरियाणातील एका सामान्य शेतकरी कुटुंबातील मुलीला मोदी सरकारच्या ‘वर्चस्वामुळे’ आज घरी जावे लागले आहे, हे देशाचे दुर्दैव आहे. पैलवान मुली न्याय मागण्यासाठी जंतरमंतरवर बसल्या पण भाजप सरकारने त्यांना दिल्ली पोलिसांच्या बुटांनी ठेचून काढलं. तर महिला कुस्तीपटूंनी स्वत: पंतप्रधान मोदी, गृहमंत्री आणि क्रीडा मंत्री यांच्याकडे न्यायाची मागणी केली होती. सुप्रीम कोर्टाच्या आदेशानंतर एफआयआर नोंदवण्यात आला मात्र भाजप खासदार ब्रिजभूषण सिंह यांना अटक करण्यात आली नाही.’
सुरजेवाला म्हणाले, ‘देशातील मुलींचा मोदी सरकारला प्रश्न आहे की मोदी सरकार गप्प का आहे? शेतकऱ्यांच्या पैलवान मुलींच्या अपमानावर देशाची संसद गप्प का? देशाचे राष्ट्रपती, पंतप्रधान, लोकसभा-राज्यसभेचे अध्यक्ष, प्रसिद्ध क्रीडा क्षेत्रातील व्यक्ती गप्प का आहेत? मग आता वर्चस्व, भीती, धाकधूक आणि अन्याय हे नवीन भारताचे सामान्य आहे असे आपण काय गृहीत धरू शकतो.
काय आहे संपूर्ण प्रकरण..?
भारतीय कुस्ती महासंघाच्या गुरुवारी झालेल्या निवडणुकीत ब्रिजभूषण शरण सिंह यांचे विश्वासू संजय सिंह अध्यक्षपदी विजयी झाले. संजय यांना 40 मते मिळाली, तर माजी राष्ट्रकुल स्पर्धेत सुवर्णपदक विजेती अनिता शेओरान यांना 7 मते मिळाली. संजय हे वाराणसीचे रहिवासी असून ब्रिजभूषण यांच्या जवळचे आहे.
कुस्तीपटू बजरंग पुनिया, विनेश फोगट आणि साक्षी मलिक यांनी निवडणुकीचे निकाल निराशाजनक असल्याचे वर्णन केले. साक्षी मलिकने कुस्तीतून निवृत्ती जाहीर केली आहे. या तिन्ही पैलवानांच्या नेतृत्वाखाली अनेक पैलवानांनी जंतरमंतरवर ब्रिजभूषण यांच्या विरोधात निदर्शने केली होती. या कुस्तीपटूंनी ब्रिजभूषण यांच्यावर महिला कुस्तीपटूंचा लैंगिक छळ केल्याचा आरोप केला होता. याप्रकरणी दिल्ली पोलिसांनी एफआयआरही नोंदवला आहे. यानंतर कुस्तीपटूंनी क्रीडा मंत्री अनुराग ठाकूर यांची भेट घेतली. यादरम्यान ठाकूर यांनी ब्रिजभूषण यांच्या कुटुंबातील कोणत्याही सदस्याला किंवा जवळच्या व्यक्तीला WFI निवडणूक लढवण्याची परवानगी दिली जाणार नाही, असे आश्वासन दिले होते.
WFI मधील निवडणूक प्रक्रिया जुलैमध्ये सुरू झाली, परंतु विविध न्यायालयीन प्रकरणांमुळे त्यास विलंब झाला. पंजाब आणि हरियाणा उच्च न्यायालयाने घातलेली बंदी सर्वोच्च न्यायालयाने नुकतीच रद्द केली होती. त्यानंतर या निवडणुका झाल्या.