चौकशीला सामोरे जाण्याची केली मागणी
मुंबई (प्रतिनिधी) – पोलिसांची पगाराची खाती ऍक्सिस बॅंकेकडे वर्ग करताना मुख्यमंत्र्यांनी पदाचा दुरुपयोग केला असून मुख्यमंत्री देवेंद्र फडणवीस यांनी तत्काळ पदाचा राजीनामा देऊन चौकशीला सामोरे जावे, अशी मागणी महाराष्ट्र प्रदेश कॉंग्रेस कमिटीच्या प्रचार समितीचे अध्यक्ष, माजी खासदार नाना पटोले यांनी केली आहे.
गांधी भवन येथे पत्रकारपरिषदेला संबोधित करताना पटोले म्हणाले की, पोलिसांची पगाराची खाती ऍक्सिस बॅंकेत वर्ग केल्याच्या मुद्द्यावर मुख्यमंत्री खोटे बोलत आहेत. स्व. विलासराव देशमुख मुख्यमंत्री असताना 2005 सालीच पोलिसांची पगाराची खाती ऍक्सिस वर्ग करण्याचा निर्णय घेतला होता, असा दावा मुख्यमंत्र्यांनी नुकताच एका मुलाखतीत केला आहे.
मात्र, त्यांचा हा दावा खोटा असल्याचे सांगून स्व. विलासराव देशमुख यांच्या काळात पोलिसांची पगार खाती वर्ग करण्यासंदर्भात काढलेल्या शासन निर्णयामध्ये वेगवेगळ्या 15 बॅंकांची नावे होती. त्या शासनिर्णयात ही खाती एकट्या ऍक्सिस बॅंकेत वर्ग करावीत असे म्हटले नव्हते.
मात्र 2017 मध्ये राज्याचे मुख्यमंत्री आणि गृहमंत्री देवेंद्र फडणवीस यांच्या आदेशाने पोलीस मुख्यालयातून एक परिपत्रक काढण्यात आले आणि पोलिसांचे पगार ऍक्सिस बॅंकेतून करण्याचा निर्णय झाला, असा आरोप पटोले यांनी केला.
सत्तेच्या दुरुपयोगामुळे पत्नाली बढती?
याविरोधात मुंबईच्या उच्च न्यायालयाच्या नागपूर खंडपीठात एक याचिका दाखल करण्यात आली होती. या प्रकरणातील गडबड लक्षात आल्याने न्यायालयाने या याचिकेचे जनतहित याचिकेमध्ये रूपांतर करून घेतले आहे. याचाच अर्थ न्यायालयाला याचे गांभीर्य समजले आहे. त्यामुळे मुख्यमंत्र्यांनी आपल्या पदाचा राजीनामा देऊन चौकशीला सामोरे जावे, असे पटोले म्हणाले. मुख्यमंत्र्यांच्या पत्नी अमृता फडणवीस या ऍक्सिस बॅंकेत नोकरीला आहेत. गेल्या पाच वर्षात मुख्यमंत्र्यांनी सत्तेचा दुरुपयोग करून ऍक्सिस बॅंकेला मदत केली म्हणूनच अमृता फडणवीस यांची बॅंकेच्या उपाध्यक्षपदी बढती झाली का? असा सवालही पटोले यांनी उपस्थित केला.