पुणे – महाराष्ट्र लोकसेवा आयोगामार्फत (एमपीएससी) घेण्यात येणाऱ्या विविध पदांच्या परीक्षेसाठी अर्ज भरण्याची प्रक्रिया सुरू आहे. परंतु काही तांत्रिक कारणामुळे विद्यार्थ्यांना ऑनलाइन अर्ज करण्यास अडचणी येत होत्या. त्यामुळे आयोगाने अर्ज करण्याच्या प्रक्रियेत स्थगिती देण्याचा निर्णय घेतला असून सर्व जाहिरातीला अनुसरून अर्ज सादर करण्यासाठी पुरेशी मुदत दिली जाणार आहे, असे आयोगाने स्पष्ट केले आहे.
करोनामुळे महाराष्ट्र लोकसेवा आयोगाला विविध पदांच्या परीक्षा घेता आल्या नाहीत. तसेच काही कारणांमुळे परीक्षांसाठी अर्जही करता आला नाही. त्यामुळे राज्य शासनाने उमेदवारांच्या वयोमर्यादेत वाढ करण्याचा निर्णय घेतला होता. त्यानुसार परीक्षा अर्ज भरण्यास मुदतवाढ देऊन येत्या 17 जानेवारीपर्यंत अर्ज स्वीकारले जाणार असल्याचे आयोगाने यापूर्वीच स्पष्ट केले होते. परंतु, छायाचित्र, स्वाक्षरी अपलोड न होणे, परीक्षा अर्जाचे शुल्क ऑनलाइन पद्धतीने जमा न होणे अशा अडचणी विद्यार्थ्यांना येत होत्या.
याबाबत आयोगाकडे अनेक उमेदवारांनी तक्रारी केल्या होत्या. त्यानंतर आयोगाने आता सर्व पदांच्या परीक्षेसाठी स्वीकारल्या जाणाऱ्या अर्जास स्थगिती दिली. तसेच परीक्षा अर्ज जमा करताना जाहिरातीला अनुसरून परीक्षा अर्ज जमा करण्याचीसाठी पुरेसा कालावधी दिला जाणार असल्याचे आयोगाने म्हटले आहे.
