सातारा – संभाजीनगर ग्रामपंचायत हद्दीत बाजार समितीच्या नवीन इमारतीच्या भूमिपूजनाच्या मुद्द्यावरून भाजपचे खासदार उदयनराजे भोसले आणि आमदार शिवेंद्रसिंहराजे भोसले हे बुधवारी सकाळी आमनेसामने आल्याने तणाव निर्माण झाला होता. दोन्ही नेत्यांचे कार्यकर्ते आक्रमक झाल्याने, परिस्थिती नियंत्रणात आणताना पोलिसांची कसरत झाली. अशात आज या वादानंतर आज उपमुख्यमंत्री देवेंद्र फडणवीस यांनी दोन्ही राजेंची भेट घेतली.
यावर मीडियाशी बोलतांना देवेंद्र फडणवीस यांनी या भेटीचा तपशील विचारले असता सांगितले,’दोघांशीही विविध प्रश्नांवर माझी चर्चा झाली. इथले काही सिंचनाचे प्रश्न आहेत त्यावर चर्चा केली. यासंबंधी त्यांनी मला काही निवेदनं दिली आहेत. तसेच विकासकामांवरही चर्चा झाली. दोन्ही राजेंना जनतेचे प्रश्न मांडायचे आहेत. मला असं वाटतं की, अशा गोष्टी कधीकधी होत असतात. परंतु तिथे काहीतरी गंभीर घडतंय असं काही नाही. किंवा कुठलीही अडचणीची गोष्ट नाही. असं म्हणत त्यांनी उदयनराजे भोसले आणि आमदार शिवेंद्रसिंहराजे भोसले हे आमनेसामने आल्याचा मुद्यावर स्पष्ट मत मांडलं नाही.
दरम्यान, संभाजीनगर येथील जागेत सातारा कृषी उत्पन्न बाजार समितीच्या इमारतीचे भूमिपूजन आ. शिवेंद्रसिंहराजे यांच्या हस्ते होणार होते. त्याची तयारी करण्यात आली होती. मात्र, त्यापूर्वी सकाळीच उदयनराजेंच्या कार्यकर्त्यांनी तेथील साहित्य फेकून दिले. उदयनराजेदेखील थोड्याच वेळात तिथे पोहोचले. त्यांच्यासमोर समर्थकांनी तेथील शेड जमीनदोस्त केले. या घटनेमुळे दोन्ही राजांमध्ये आगामी काळात जोरदार संघर्ष होण्याची शक्यता निर्माण झाली आहे. येथे कुळांची जागा आहे. येथे बाजार समितीची इमारत कशी होऊ शकते? ही जागा माझी आहे. तेथे कोणी आले, तर त्याचे गंभीर परिणाम भोगावे लागतील, असा सज्जड इशारा उदयनराजेंनी शिवेंद्रसिंहराजेंच्या समर्थकांना दिला. मात्र, थोड्याच वेळात शिवेंद्रसिंहराजे भोसले, बाजार समितीचे सभापती विक्रम पवार, संचालक तेथे आले. कुळांच्या जागेत तुम्ही बाजार समितीची इमारत कशी उभी करू शकता,
असा सवाल उदयनराजेंनी शिवेंद्रराजेंना केला. या संदर्भात मुंबई उच्च न्यायालय आणि सर्वोच्च न्यायालयाचे निर्णय बाजार समितीच्या बाजूने झाले आहेत. या जागेचा सातबारा उतारा बाजार समितीच्या नावे झाला आहे. येथे इमारत होणारच, असा पवित्रा शिवेंद्रसिंहराजेंनी घेतला. तुमच्याकडे काही कायदेशीर कागदपत्रे असतील, तर ती सादर करावीत. आमची बाजू कायदेशीर आहे.
हा प्रश्न कायदेशीर मार्गाने सोडवावा, असे त्यांनी ठणकावले. ही खडाजंगी सुरू असताना जमिनीचे वहिवाटदार तेथे अचानक उपस्थित झाले. ही जमीन आमची आहे. आम्ही येथे कोणालाही पाय ठेवू देणार नाही. उदयनराजे आमचे नेते आहेत, असे म्हणत त्यांनी घोषणाबाजी केली. सातारा शहर पोलीस ठाण्याचे पोलीस निरीक्षक हेमंत शहा यांनी दोन्ही बाजूंच्या कार्यकर्त्यांना शांत करण्याचा प्रयत्न केला. त्यांनी दोन्ही नेत्यांची समजूत घातली. या गोंधळातच शिवेंद्रराजे यांनी तेथे भूमिपूजन केले. कार्यकर्त्यांनी फटाक्यांची आतषबाजी केली. त्यावर, उदयनराजेंनी तीव्र नाराजी व्यक्त करत, हे काय चाललंय, असा उद्विग्न प्रश्न केला. त्याच वेळी दोन्ही बाजूंनी घोषणाबाजी आणि धक्काबुक्की सुरू झाली. मात्र, पोलिसांनी हस्तक्षेप करत दोन्ही बाजूंच्या कार्यकर्त्यांना बाजूला केले.
यावेळी संभाजीनगरच्या माळावर प्रचंड गर्दी झाली होती. शिवेंद्रराजे आणि त्यांचे कार्यकर्ते तेथून निघून गेल्यावर, उदयनराजेंनी तेथे कुदळ मारुन, विकासकामांचे भूमिपूजन झाल्याचे जाहीर केले. संभाजीनगर ग्रामपंचायतीच्या सदस्यांनीही तेथे विकासकामांचे नारळ फोडले आणि घोषणाबाजी केली. या ठिकाणी पोलिसांचा मोठा फौजफाटा तैनात होता. दरम्यान, पोलीस निरीक्षक हेमंत शहा यांनी सातारा शहर पोलीस ठाण्याची सूत्रे नुकतीच स्वीकारली आहेत. साताऱ्यात काम करणे म्हणजे तारेवरची कसरत आहे, याची प्रचिती त्यांना लगेचच आली; परंतु अनुभव पणाला लावून त्यांनी दोन्ही राजांमध्ये मध्यस्थी केली.