पुणे – लष्कर परिसरातील फॅशन स्ट्रीट मार्केटचा प्रश्न गेल्या तीन महिन्यांपासून प्रलंबित होता. अखेर मार्केटमधील व्यावसायिकांनी बोर्डाच्या परवानगीविनाच बाजारपेठ खुली केली आहे. मार्केटमधील 30 टक्केच दुकाने खुली करत सुरक्षिततेच्या सर्व नियमांचे पालन करून, याठिकाणी व्यवसाय करणार असल्याची ग्वाही व्यावसायिकांकडून देण्यात आली आहे.
करोना आणि लॉकडाऊनमुळे कॅन्टोन्मेंट बोर्डाने लष्कर परिसरातील प्रमुख बाजारपेठा बंद केल्या होत्या. जून महिन्यात लॉकडाऊनचे नियम शिथिल करत परिसरातील दुकानांना तसेच शिवाजी मार्केट या बाजारपेठा पुन्हा सुरू करण्यासाठी बोर्डाने सशर्त परवानगी दिली आहे. परंतु, फॅशन स्ट्रीट बाबत अद्याप निर्णय घेण्यात आलेला नाही. त्यामुळे येथील व्यावसायिकांच्या अर्थिक संकटात वाढ होत असून बोर्डाच्या भूमिकेबाबत सातत्याने नाराजी व्यक्त केली जात आहे.
दरम्यान, राज्य सरकारने लॉकडाऊन नियम शिथिल करत, बाजारपेठा उघडण्यास परवानगी दिली आहे. बोर्डाकडून अद्याप ही परवानगी मिळालेली नाही. करोना संसर्गाचे कारण देऊन बोर्ड बैठक घेण्यास टाळाटाळ करत आहे. मात्र, व्यावसायिकांसमोरील अर्थिक संकट लक्षात घेता, बाजारपेठा खुल्या होणे गरजेचे आहे. त्यामुळेच आम्ही राज्य सरकारच्या परवानगीच्या आधारावर फॅशन स्ट्रीट मार्केट चालू केले आहे. याठिकाणी सुरक्षिततेच्या सर्व नियमांचे पालन करणार असल्याचे फॅशन स्ट्रीट व्यापारी असोसिएशनचे प्रमुख भगत तौर यांनी सांगितले.