हैदराबाद: कोविड-19 वर उपचारांसाठी देशांतर्गत विकसित केलेल्या “कोव्हॅक्सिन’ या औषधाच्या मानवी चाचणीला “ड्रग कंट्रोलर जनरल ऑफ इंडिया’ने मंजूरी दिली आहे. हैदराबादेतील भारत बायोटेकने “आयसीएमआर’ आणि “एनआयव्ही’च्या सहकाऱ्याने हे औषध विकसित केले आहे.
वैद्यकीय पूर्व अभ्यासादरम्यान हे औषध सुरक्षित आणि प्रतिकारकक्षमता वाढवणारे आढळल्यामुळे आता या औषधाचा “सार्स-कोव्ह-2’साठी फेज 1 आणि फेज 2 च्या वैद्यकीय चाचण्यांना मंजूरी देण्यात आली आहे. या चाचण्या पुढील महिन्यापासून देशभरात सुरू होणार आहेत.
हे औषध विकसित करण्याच्या प्रक्रियेमध्ये भारतीय वैद्यकीय संशोधन परिषद (आयसीएमआर) आणि राष्ट्रीय विषाणू संस्था (एनआयव्ही) ची भूमिका महत्वाची आहे, असे कंपनीने प्रसिद्धीस दिलेल्या निवेदनात म्हटले आहे.
भारत बायोटेकच्या जेनोम व्हॅलीतील बीएसएल-3 या उच्च कंटेन्मेंट सुविधा केंद्रात हे पूर्णपणे देशी बनावटीचे औषध विकसित करण्यात आले आहे.
पूर्व वैद्यकीय अभ्यासाचे निष्कर्श कंपनीने सादर केल्यानंतर आरोग्य आणि कुटुंब कल्याण मंत्रालयांतर्गत सेंट्रल ड्रग स्टॅन्डर्ड कंट्रोल ऑर्गनायजेशनच्या ड्रग कंट्रोलर जनरल ऑफ इंडियाने या औषधाच्या फेज-1 आणि फेज-2 च्या मानवी चाचण्यांना परवानगी दिली आहे, अशी माहिती कंपनीचे व्यवस्थापकीय संचालक आणि अध्यक्ष डॉ. कृष्णा एल्ला यांनी सांगितले. या औषधासाठी तंत्रज्ञानाचा उपयोग करण्याच्या हेतूने कंपनीच्या संशोधन पथकाने अविश्रांत परिश्रम घेतले आहेत, असेही त्यांनी सांगितले.
भारत बायोटेकेक व्यतिरिक्त किमान 5 भारतीय कंपन्याही सध्या करोनावरील औषध विकसित करण्याच्या कामात सक्रिय आहेत. अन्य देशातही औषध संशोधनाचे कार्य वेगाने सुरू आहे. औषधाच्या व्यापक उत्पादनामध्ये जॉन्सन ऍन्ड जॉन्सन ही कंपनीही आघाडीवर असून 2021 पर्यंत औषधाच्या 1 अब्ज डोसचे उत्पादन करण्यासाठी कंपनीकडून उत्पादन क्षमताही वाढवली जात आहे. सर्वसामान्य नागरिकांसाठी हे डोस ना नफा तत्वावर विकसित करण्यात येणार आहेत.