दि. 1 जानेवारीपासून नोंदणी विभागाच्या संकेतस्थळावर मिळणार माहिती
पुणे – जमीन, सदनिका आणि दुकाने यांचे चालू बाजारमूल्य तसेच त्या मालमत्तेवर भरावे लागणारे मुद्रांक शुल्क (स्टॅम्पड्युटी) याची माहिती आता घरबसल्या समजणार आहे. नोंदणी व मुद्रांक शुल्क विभागाने ही सुविधा उपलब्ध करून दिली आहे. यामुळे एखाद्या मालमत्तेचे बाजारमूल्य अथवा मुद्रांक शुल्क याची माहिती घेण्यासाठी दुय्यम निबंधक कार्यालयात जाण्याची आवश्यकता नाही. या सुविधेमुळे मूल्यांकनाच्या प्रक्रियेमध्ये पारदर्शकता येणार आहे, अशी माहिती राज्याचे नोंदणी महानिरीक्षक अनिल कवडे यांनी दिली. दि.1 जानेवारीपासून ही सुविधा नोंदणी विभागाच्या संकेतस्थळावर उपलब्ध होणार आहे.
दस्त नोंदणीसाठी मुद्रांक शुल्क आकारण्यासाठी वार्षिक मूल्यदर तक्ते (रेडी रेकनर) व सविस्तर मूल्यांकनासाठी मार्गदर्शक सूचना नोंदणी विभागामार्फत दरवर्षी दिल्या जातात. मूल्यांकनासाठीच्या सूचना या तांत्रिक स्वरूपाच्या असल्याने सर्वसामान्य नागरिकांना यासाठी दुय्यम निबंधक कार्यालयात जावे लागते. मुद्रांक शुल्क आकारणीची रक्कम निश्चित करून घ्यावी लागते.
या सर्व पार्श्वभूमीवर अधिकाधिक सुविधा ऑनलाइन पद्धतीने उपलब्ध करून देण्यासाठी नोंदणी व मुद्रांक शुल्क विभागाने पुढाकार घेतला. मुंबई महानगरपालिका क्षेत्रासाठी मागील वर्षी ई-व्हॅल्युएशन ही सुविधा उपलब्ध करून देण्यात आली. मुंबईमध्ये ही सुविधा प्रायोगित तत्त्वावर सुरू करण्यात आली. या प्रणालीचा वापर मुंबईमध्ये अधिकाधिक नागरिकांनी केला. त्यास चांगला प्रतिसाद मिळाला. या सुविधेमुळे कमी मुद्रांक शुल्क भरल्या प्रकरणीचे दावेदेखील कमी झाल्याचे दिसून आले. ही प्रणाली यशस्वी झाल्याने आता संपूर्ण राज्यात ई-व्हॅल्युएशन ही प्रणाली राबवण्याचा निर्णय नोंदणी विभागाने घेतला आहे.
ई-व्हॅल्युएशन ही मूल्यांकन प्रणाली नोंदणी महानिरीक्षक व मुद्रांक नियंत्रक, सहसंचालक नगर रचना मूल्यांकन विभाग यांच्या मार्गदर्शनाखाली राष्ट्रीय सूचना विज्ञान केंद्र (एनआयसी) यांनी विकसित केली आहे. नववर्षामध्ये नागरिकांना पारदर्शकपणे तत्पर सुविधा उपलब्ध करून देण्याचा नोंदणी विभागाचा मानस आहे.
– अनिल कवडे, नोंदणी महानिरीक्षक.