पुणे –महापालिका निवडणुकांचा कार्यक्रम अद्याप जाहीर झालेला नसला तरी शहरात राजकीय ज्वर चढण्यास सुरूवात झाली आहे. त्यामुळे मार्च महिन्यात पॉलिटीकल हिट वाढणार असून पंतप्रधान नरेंद्र मोदी, राष्ट्रवादीचे शहराध्यक्ष शरद पवार, मनसे अध्यक्ष राज ठाकरे यांच्या सभांनी शहरातील राजकीय वातावरण महापालिका निवडणूकांच्या तोंडावर चांगलेच तापणार आहे.
दि. 1 मार्चला राष्ट्रवादी कॉंग्रेसचा “परिवार संवाद’ पुण्यात येणार असून प्रदेशाध्यक्ष जयंत पाटील यांच्यासह पक्षाचे नेते शहरातील राष्ट्रवादीच्या कार्यकर्त्यांशी थेट संवाद साधणार असून महापालिका निवडणूकांच्या तोंडावर सत्ताधारी भाजपला रोखण्यासाठी राष्ट्रवादीकडून पुण्यातील कार्यकर्त्यांना बळ देण्यासाठी प्रदेशाध्यक्ष विधानसभा निहाय बैठका घेणार आहेत. त्यानंतर दि. 5 मार्चला राष्ट्रवादीचे अध्यक्ष शरद पवार दोन दिवसांच्या पुणे दौऱ्यावर येणार असून त्यांच्या हस्ते शहरातील राष्ट्रवादीच्या नगरसेवकांच्या विकासकामांची उद्घाटने करणार असून ते पक्षाच्या पदाधिकाऱ्यांची बैठकही घेण्याची शक्यता वर्तविली जात आहे.
त्यानंतर लगेचच दुसऱ्या दिवशी पंतप्रधान नरेंद्र मोदी पुणे दौऱ्यावर असून या दौऱ्यात ते महापालिकेच्या वेगवेगळया विकासकामांचे भूमीपूजन तसेच मेट्रोचे उद्घाटनही करणार आहेत. यानिमित्ताने त्यांची जाहीर सभा घेऊन महापालिकेच्या निवडणूकांसाठी शक्ती प्रदर्शन करण्याचे भाजपकडून नियोजन असून पंतप्रधान मोंदीच्या दौऱ्याचे नियोजन माजी मुख्यमंत्री देवेंद्र फडणवीस स्वत: लक्ष देऊन करीत आहेत. त्यानंतर लगेचच मनसे अध्यक्ष राज ठाकरे यांचीही जाहीर सभा दि. 9 मार्चला होणार आहे. पक्षाच्या वर्धापनदिना निमित्ताने पुण्यातील शहर पदाधिकाऱ्यांच्या आग्रहाखातर ही सभा पुण्यात घेतली जाणार असल्याचे सांगण्यात येत आहे.