मसूर -राष्ट्रवादी कॉंग्रेस पार्टीच्या 21 व्या वर्धापन दिनानिमित्त सहकारमंत्री बाळासाहेब पाटील यांनी कराड उत्तर व कराड दक्षिण तसेच जिल्ह्यातील सर्व कार्यकर्ते व पदाधिकारी यांना वर्धापन दिनानिमित्त शुभेच्छा दिल्या. राष्ट्रवादी कॉंग्रेस पार्टी कराड उत्तर व दक्षिण मतदार संघाच्यावतीने सह्याद्रि साखर कारखान्याचे संचालक, युवा नेते जशराज पाटील यांच्या नेतृत्वाखाली आयोजित केलेल्या रक्तदान शिबीरप्रसंगी ते बोलत होते.
याप्रसंगी खा. श्रीनिवास पाटील, अर्थ व शिक्षण समिती सभापती मानसिंगराव जगदाळे, श्री शिवाजी शिक्षण संस्था ट्रस्टचे सचिव प्रकाश पाटील, कराड उत्तर राष्ट्रवादी कॉंग्रेसचे अध्यक्ष देवराज पाटील, लोकशाही आघाडीचे अध्यक्ष सुभाषराव पाटील, कराड पंचायत समितीचे सभापती प्रणव ताटे उपस्थित होते.
ना. पाटील यावेळी म्हणाले, करोना महामारीत रुग्णांना रक्ताचा तुटवडा जाणवू नये या हेतूने राष्ट्रीय नेते व राष्ट्रवादी कॉंग्रेस पार्टीचे अध्यक्ष शरद पवार व जलसंपदामंत्री जयंत पाटील यांनी राज्यातील सर्व जिल्ह्यात राष्ट्रवादी कॉंग्रेस पक्षाच्यावतीने रक्तदान शिबिर घेण्याचे आवाहन केले होते. या आवाहनास प्रतिसाद देत राष्ट्रवादी कॉंग्रेस पार्टी कराड उत्तर व कराड दक्षिण यांच्यावतीने हे रक्तदान शिबिर यशवंतराव चव्हाण कॉलेज ऑफ सायन्स कराड येथे आयोजित केले आहे. रक्तदान शिबिराचा हा उपक्रम स्तुत्य असा असून त्याला उत्स्फूर्त प्रतिसाद मिळाला. यावेळी सागर पाटील, विरोधी पक्षनेते सौरभ पाटील, आदर्श सरपंच शहाजीराव क्षीरसागर व राष्ट्रवादी महिला आघाडी तसेच सर्व सेलचे पदाधिकारी व कार्यकर्ते उपस्थित होते.