इंदापूर, (प्रतिनिधी) – तुम्ही संधी दिली तर तुमच्या अडीअडचणी सोडवण्यासाठी आम्ही दोघेही प्रयत्न करू, असे याक्षणी मी तुम्हाला आश्वासन देते. कारण, कालच आमच्या प्रदेशाध्यक्षांनी जर बारामतीचा उमेदवार आमचा असेल तर माझे नाव घेतले आहे. म्हणून मी हे आज पहिल्यांदाच बोलत आहे.
मी कालपर्यंत हे बोलत नव्हते. जनतेने अगोदरच माझी उमेदवारी जाहीर केली असली, तरी मी पहिल्यांदा असे बोलत आहे, असेही सुनेत्रा पवार म्हणाल्या. तुम्ही साथ दिली तर आम्ही दोघे तुमचे प्रश्न सोडवण्याचे काम करू, असे सूचक विधान उपमुख्यमंत्री अजित पवार यांच्या पत्नी सुनेत्रा पवार यांनी केले आहे. सुनेत्रा पवार आज इंदापूर तालुक्याच्या गाव भेट दौर्यावर आहेत.
यावेळी इंदापूर तालुक्यातील शेळगाव गावात संत मुक्ताबाई मंदिरात दर्शन घेतल्यानंतर सुनेत्रा पवार बोलत होत्या. सुनेत्रा पवार म्हणाले की, एवढ्या मोठ्या सगळ्या कामांमध्ये कमी जास्त कुठे तरी राहते; मात्र इतक्या मोठ्या प्रमाणात झालेली कामे मी पाहते तेव्हा मला अभिमान वाटतो.
लोकांच्या प्रतिक्रिया ऐकल्यावर जाणवते की, दादांनी शेवटच्या माणसापर्यंत पोहोचण्याचा प्रयत्न केला आहे. त्यांच्या अडीअडचणी सोडवण्याचा प्रयत्न केला आहे. इथून पुढे सुद्धा तुमच्या अडचणी सोडवण्याचा नक्कीच प्रयत्न होईल अशी खात्री देते.