पुणे, दि. 4 – अल्पशिक्षित, गरीब आणि विशेषत: तरुणांमध्ये हृदयविकार वाढत आहे. या आजारांचा अभ्यास करणे गरजेचे आहे. कोविड आणि लसीच्या प्रभावांचा अभ्यासही आवश्यक आहे. त्याद्वारे केलेल्या संशोधनामुळे शरीराच्या विविध भागांवर विषाणू आणि लसीचा दीर्घकालीन प्रभाव समजून घेण्यास मदत होईल, असे मत नीति आयोगाचे सदस्य (आरोग्य) डॉ. व्ही.के. पॉल, यांनी व्यक्त केले.
सिम्बायोसिसच्या लवळे कॅम्पस येथे आयोजित “सिमरिसर्च’ परिषदेत ऑनलाइन प्रणालीद्वारे डॉ. पॉल बोलत होते.
डॉ. पॉल म्हणाले, “अल्पशिक्षित आणि गरीब लोकांना क्रॉनिक कार्डिओ व्हॅस्कुलर आजारांचा धोका जास्त असतो. अनेक अभ्यासांतून असे दिसून आले आहे, की या गटातील तीव्र हृदयरोगाचे प्रमाण वाढते आहे. त्यामुळे प्रतिबंधात्मक धोरणे प्रभावीपणे संबोधित करण्यावर लक्ष केंद्रित केले पाहिजे.
सन 2016 च्या अभ्यासानुसार क्रॉनिक ऑब्स्ट्रक्टिव्ह पल्मोनरी डिसऑर्डर, मधुमेह आणि हृदयरोग हे देशातील टाळता येण्याजोग्या मृत्यूचे प्रमुख कारणे आहेत. शहरी भागातील स्थलांतरित कामगारांनाही ह्रदयविकाराचा धोका जास्त असतो. तसेच इतर देशांतील भारतीयांना देखील तेथील नागरिकांच्या तुलनेत जास्त धोका असल्याचेही त्यांनी नमूद केले.
तरुणांमध्ये हृदयविकाराच्या संख्येत वाढ झाली आहे. करोनानंतर आम्हाला याबाबत हस्तक्षेप करणे आवश्यक आहे. त्यासाठी आता दरवर्षी नागरिकांची तपासणी करावी लागेल. तसेच, उच्चरक्तदाब आणि मधुमेह यावर उपचार करणे आवशक आहे, असेही ते म्हणाले.
परिषदेला सिम्बायोसिसच्या आरोग्य विज्ञान विद्याशाखेचे अधिष्ठाता व परिषदेचे आयोजक डॉ. राजीव येरवडेकर, प्रधान संचालिका डॉ. विद्या येरवडेकर, संसर्गरोगतज्ज्ञ डॉ. रमण गंगाखेडकर, महाराष्ट्र आरोग्य विज्ञान विद्यापीठाच्या कुलगुरू लेफ्टनंट जनरल डॉ. माधुरी कानिटकर व आरोग्य क्षेत्रातील विविध मान्यवर उपस्थित होते.