पिंपरी, दि. 17 – शहरातील मिळकत कर थकबाकी असलेल्या मिळकतधारकांवर जप्तीची आणि वसुलीची जोरदार मोहीम सुरू आहे. थकबाकी असलेल्या सदनिका धारकांना कर भरण्यास सांगून पालिकेला सहकार्य करावे, अशा आशयाचे पत्र 100 सोसायट्यांच्या अध्यक्ष व सचिवांना कर आकारणी व कर संकलन विभागाने पाठविले आहे. त्यानंतरही सदनिकाधारकांनी कर न भरल्यास नाईलाजाने जंगम मालमत्ता जप्त करण्याचा इशारा कर आकारणी व कर संकलन विभागाचे सहाय्यक आयुक्त निलेश देशमुख यांनी दिला आहे. त्यामुळे मिळकतधारकांनी थकीत कर आणि चालू कर भरून महापालिकेला सहकार्य करावे, असे आवाहनही त्यांनी केले आहे.
शहरात 5 लाख 92 हजार मिळकतींची नोंद आहे. महापालिकेच्या 17 विभागीय कार्यालयामार्फत कर संकलानांचे कामकाज केले जाते. गतवर्षी कर संकलन विभागाने 625 कोटी कर वसूल केला होता. यंदा मात्र, कर आकारणी व कर संकलन विभागाचे सहाय्यक आयुक्त निलेश देशमुख यांनी 1 हजार कोटी रूपयांचे टार्गेट पूर्ण करण्यासाठी कंबर कसली आहे. चालू आर्थिक वर्षांत आत्तापर्यंत सुमारे पावणे सहाशे कोटी रूपये कराची वसुली झाली आहे.
याबाबत सहाय्यक आयुक्त निलेश देशमुख म्हणाले, शहरातील गृहनिर्माण सोसायटीमधील सदनिकांची संख्या मोठ्या प्रमाणात आहे. काही मोठ्या सोसायट्यांमध्ये एक हजार ते दीड हजार सदनिका धारकांकडे थकबाकी आहे. त्यामुळे संपूर्ण सोसायटीचे नळ कनेक्शन तोडणे जरी कायद्याने योग्य असले तरी महापालिका प्रशासन अशी कारवाई करणार नाही. मात्र, संबंधित सोसायटीमधील थकबाकीदारांनी पालिकेचा कर भरावा म्हणून सोसायटी अध्यक्ष, सचिवांनी पालिकेला सहकार्य करून संबंधितांना कर भरण्यास सांगावे. थकबाकीदारांची नावे सोसायटी नोटीस बोर्डावर लावावी. त्यानंतरही थकबाकीदार सदनिकाधारकांनी कर न भरल्यास सोसायटी अंतर्गत त्यांचे नळजोड तोडण्यासाठी अध्यक्ष, सचिवांना विचारात घेऊन कारवाई करण्यात येईल.
500 सोसायट्यांना पाठविणार पत्र
पहिल्या टप्प्यात थकबाकी असलेल्या 100 सोसायटीच्या अध्यक्ष आणि सचिवांना पालिकेने पत्र पाठविले आहे. शहरातील 500 सोसायट्यांना पत्र पाठविण्यात येणार आहेत. अध्यक्षांनी संबंधितांना थकीत कर भरण्यास सांगावे, असे आवाहन सहाय्यक आयुक्त देशमुख यांनी केले आहे. मात्र, त्यानंतरही कर न भरणाऱ्या सदनिका धारकांच्या जंगम मालमत्ता जप्त करण्यात येणार असल्याचा इशाराही त्यांनी दिला आहे.