पुणे -शहरात इन्फ्लुएंझासह करोना विषाणूनेही डोके वर काढले आहे. बदलत्या हवामानामुळे संसर्ग वाढत असल्याचे आरोग्य विभागाकडून सांगण्यात आले. त्यामुळे नागरिक सर्दी, ताप, खोकला यासारख्या लक्षणांनी त्रस्त झाले आहेत. लक्षणे दिसताच नागरिकांनी तत्काळ डॉक्टरांच्या सल्ल्याने औषधोपचार घ्यावेत, आजार अंगावर काढू नये, वेळीच निदान झाले तर उपचारही वेळेत होतील, असे आवाहन पुणे मनपा आरोग्य प्रमुख डॉ. भगवान पवार यांनी केले आहे. इन्फ्लूएंझा हा विषाणूमुळे होणारा आजार असून, त्याचे तीन उपप्रकार आहे. टाईप ए चे एच1 एन1, एच2एन2 आणि एच3एन2 हे उपप्रकार आहेत. सध्या एच3एन2चे विषाणूची लागण झालेल्या रुग्णांची संख्या वाढत असल्याचे दिसून येत आहे. शहरात जानेवारीपासून या आजाराचे रुग्ण वाढत असून, मार्चमध्ये याचे प्रमाण अधिक वाढल्याचे निदर्शनास आले. इन्फ्लूएंझा टाळण्यासाठी काय करावे? वारंवार साबण व स्वच्छ पाण्याने हात धुवावेत, पौष्टिक आहार घ्यावा लिंबू, आवळा, मोसंबी, संत्री, हिरव्या पालेभाज्यांचा आहारात समावेश पुरेशी झोप आणि विश्रांती घ्यावी, भरपूर पाणी प्यावे, नागरिकांनो हे टाळा हस्तांदोलन, धुम्रपान सार्वजनिक ठिकाणी थुंकणे लक्षणे दिसल्यावर डॉक्टरांच्या सल्ल्याशिवाय औषधे घेणे फ्लू सदृश्य लक्षणे असतील तर गर्दीच्या ठिकाणी जाणे एच3 एन2 चे 12, तर करोनाचे 25 रुग्ण पुणे :शहरात एच3एन2 संसर्गाबरोबरच करोनाने पुन्हा डोके वर काढले आहे. गेल्या 24 तासांत पुणे महापालिकेच्या वतीने करण्यात आलेल्या नमुने तपासणीतील 267 नमुने लॅबकडे पाठविण्यात आले. त्यामध्ये एच3एन2 चे 12 आणि करोनाचे 25 जणांना लागण झाल्याचा अहवाल समोर आला. शहरात जानेवारीपासून सापडत असलेल्या एच3एन2 रुग्णांची संख्या मार्च महिन्यात झपाट्याने वाढताना दिसत आहे. त्याचबरोबर करोनाचेही रुग्ण वाढत असून, नागरिकांनी करोना काळात जी खबरदारी आणि काळजी घेतली त्याचे काटेकोर पालन करावे. मास्कचा वापर करावा, हस्तांदोलन टाळावे. वेळोवेळी साबणाने स्वच्छ हात धुवावे. आजारी असलेल्या व्यक्तींनी बाहेर फिरू नये, घरात स्वत:ला विलगीकरण करून घ्यावे.
