पुणे – धनकवडी स्मशानभूमीत एका तरुणाच्या अंगावर पेट्रोल टाकून त्याला जाळण्याचा प्रयत्न करण्यात आला. यामध्ये तरुण 25 टक्के भाजला असून सहकारनगर पोलीस ठाण्यात खूनाच्या प्रयत्नाचा गुन्हा दाखल करण्यात आला आहे.
सुरज विजय मरळ (28,रा.जिवनधारानगर, धनकवडी ) असे जखमी तरुणाचे नाव आहे. त्याच्या खूनाचा प्रयत्न केल्याप्रकरणी गोविंद उर्फ सत्येंद्र यादव (मागंडेवाडी, कात्रज) याच्यावर गुन्हा दाखल करण्यात आला आहे.
पोलिसांनी दिलेल्या माहितीनूसार, फिर्यादी सुरज मरळ याचे धनकवडीमध्ये कपडे विक्रीचे छोटेसे दुकान होते. लॉक डाऊनमध्ये ते बंद पडल्याने तो सध्या घरातूनच कपड्यांची विक्री करतो. तर आरोपी गोविंद हा त्याला बालपणापासूनचा मित्र आहे. तो सध्या कोणतेही कामधंदे करत नाही. रविवारी सुरज हा कपडे विक्रीचे पैसे गोळा करत असताना,त्याला गोविंद रस्त्यामध्ये भेटला.
यानंतर दोघांनी एका बिअरबारमध्ये मद्यपान केले. यानंतर दोघे धनकवडी स्मशानभूमीत एकत्र गप्पा मारत बसले. रात्री दिडच्या सुमारास दारुच्या नशेत गोविंदने फिर्यादी सुरजला शिवीगाळ केली. यामध्ये वाद वाढत गेल्याने गोविंदने जवळचा सिमेंट ब्लॉक सुरजच्या डोक्यात मारला. यानंतर सुरजने वडिलांच्या गाडीत भरण्यासाठी आणलेली पेट्रोलची बाटली गोविंदने घेतली.
यातील पेट्रोल सुरज्या अंगावर ओतून त्याला पेटवून दिले. सुरजने कसाबसा जखमी अवस्थेत आपला जीव वाचवला. दरम्यान गोविंद घटनास्थळावरुन पळून गेला. याप्रकरणाचा तपास सहायक पोलीस निरीक्षक उमेश लोंढे करत आहेत.