नवी दिल्ली – सोशल मीडिया प्लॅटफॉर्म ‘एक्स’ने एका महिन्यात दोन लाखाहून अधिक खाते बंद केली आहेत. बाल लैंगिक शोषण आणि नग्नतेला प्रोत्साहन देणाऱ्या खात्यांवर बंदी घालण्यात आली आहे. माहिती तंत्रज्ञान (IT) नियम 2021 नुसार प्रकाशित मासिक अहवालात कंपनीने ही माहिती दिली आहे. (twitter policy violation x bans 2 lakhs indian users accounts)
अहवालानुसार, कंपनीने 26 फेब्रुवारी ते 25 मार्च दरम्यान एकूण 213,862 एक्स खात्यांवर बंदी घातली आहे. यामध्ये देशातील दहशतवादाला प्रोत्साहन देण्यासाठी मायक्रो-ब्लॉगिंग प्लॅटफॉर्मने बंद केलेल्या 1,235 खात्यांचाही समावेश आहे.
एक्स ने 26 फेब्रुवारी ते 25 मार्च दरम्यान 86 तक्रारी निकाली काढल्या आहेत, जी खाती निलंबनाविरुद्ध अपीलांशी संबंधित होती. यापैकी 7 खात्यांचा आढावा घेतल्यानंतर त्यांचे निलंबन मागे घेण्यात आले. उर्वरित अहवाल दिलेली खाती कंपनीच्या निर्णयानुसार निलंबित करण्यात आली आहे.
एक्स ला या कालावधीत एकूण 5,158 तक्रारी प्राप्त झाल्या होत्या. भारतातून प्राप्त झालेल्या तक्रारींपैकी सर्वाधिक 3,074 तक्रारी नियमांचे उल्लंघनाच्या होत्या. यानंतर, 953 तक्रारी संवेदनशील अडल्ट सामग्रीशी संबंधित आहेत, 412 तक्रारी द्वेषपूर्ण वर्तनाशी संबंधित आहेत आणि 359 तक्रारी गैरवर्तन आणि छळाशी संबंधित आहेत.
