Maharashtra Board SSC Result 2024 : महाराष्ट्र राज्य माध्यमिक व उच्च माध्यमिक शिक्षण मंडळामार्फत मार्च 2024 मध्ये घेण्यात आलेल्या इयत्ता दहावीच्या परीक्षेचा निकाल जाहीर करण्यात आला आहे. राज्याचा निकाल 95.81 टक्के एवढा लागला आहे. मागील वर्षाच्या तुलनेत यंदा निकालात 1.98 टक्क्याने वाढ झालेली आहे. यंदाही निकालात मुलांपेक्षा मुली अव्वल ठरल्या आहेत.
पुणे, नागपुर, छत्रपती संभाजीनगर, मुंबई, कोल्हापूर, अमरावती, नाशिक, लातूर व कोकण या नऊ विभागीय मंडळामार्फत 1 ते 26 मार्च 2024 या कालावधीत दहावीची परीक्षा घेण्यात आली होती. या परीक्षेसाठी सुमारे 16 लाख विद्यार्थ्यांनी नोंदणी केली होती.
यंदा प्रथमच मे महिन्यातच दहावीचा निकाल जाहीर होत आहे. यापूर्वी जून महिन्याच्या पहिल्या आठवड्यात किंवा जुलैमध्ये निकाल जाहीर करण्याची परंपरा होती. यंदा विद्यार्थ्यांचे अंतर्गत मूल्यमापनाचे गुण ऑनालाईन पद्धतीने भरण्याचे बंधन घालण्यात आल्यामुळेच निकाल लवकर जाहीर होत आहे.
राज्य मंडळाचे अध्यक्ष शरद गोसावी यांनी पत्रकार परिषद घेऊन निकाल जाहीर केला आहे. यावेळी सचिव अनुराधा ओक, सहसचिव माणिक बांगर उपस्थित होते. मुलींचा निकाल 97.21 टक्के लागला आहे तर, मुलांचा निकाल 94.56 टक्के लागला आहे.
मुलींचा निकाल मुलांपेक्षा 2.65 टक्के ने अधिक आहे. राज्यात कोकण विभागाचा सर्वाधिक निकाल 99 टक्के तर सर्वात कमी निकाल नागपूर विभागाचा 94.73 टक्के आहे. राज्यातील नऊ विभागांमध्ये शुन्य टक्के निकाल लागलेल्या शाळांची संख्या 38 आहे.
राज्यातील 38 शाळांचा निकाल शुन्य टक्के :
पुणे : 6
नागपूर : 5
छत्रपती संभाजीनगर : 5
मुंबई : 5
कोल्हापूर : 1
अमरावती : 7
नाशिक विभाग : 3
लातूर : 6
शंभर टक्के निकाल लागलेल्या शाळांची संख्या : 9382
पुणे :1542
नागपूर : 1007
छत्रपती संभाजीनगर : 840
मुंबई : 1533
कोल्हापूर : 1270
अमरावती: 1063
नाशिक विभाग :1006
लातूर : 608
कोकण : 513
विभागनिहाय निकाल :
पुणे : 96.44
नागपुर : 94.73
संभाजीनगर : 95.19
मुंबई : 95.83
कोल्हापूर : 97.45
अमरावती : 95.58
नाशिक : 95.28
लातूर : 95.27
कोकण : 99.01
राज्यातील 187 विद्यार्थ्यांना 100 टक्के गुण मिळाले आहेत. अतिरिक्त गुण घेऊन त्यांना 100 टक्के गुण मिळालेले आहेत. प्रश्न पत्रिका सोडवून एकाला ही 100 टक्के गुण मिळालेले नाहीत, अशी माहिती बोर्डाकडून देण्यात आली.