पिंपरी -भारत सरकार गृहनिर्माण आणि शहरी व्यवहार मंत्रालयाच्या वतीने आयोजित स्मार्ट शहरेः स्मार्ट शहरीकरण या स्पर्धेत पिंपरी-चिंचवड महापालिका व स्मार्ट सिटीने सर्वोत्कृष्ट कामगिरी बजाविली आहे. या कामगिरीबद्दल ओपन डेटा विक, क्लायमेट चेंज आणि प्लेस मेकींग या तीन विविध पुरस्कारांनी मंगळवार (दि.19) रोजी सन्मानित करण्यात आले आहे.
सुरत (गुजरात) येथे 18 ते 19 एप्रिल 2022 रोजी दरम्यान “स्मार्ट शहरे: स्मार्ट शहरीकरण’ परिषदेत आयोजन करण्यात आले होते. यामध्ये पिंपरी- चिंचवडने केलेल्या सर्वोत्कृष्ठ कामगिरीबाबत स्मार्ट सिटी मिशनचे जॉईंट सेक्रेटरी आणि मिशन डायरेक्टर कुणाल कुमार यांच्या हस्ते पुरस्कार वितरण सोहळा पार पडला. महापालिका आयुक्त तथा स्मार्ट सिटीचे मुख्य कार्यकारी अधिकारी राजेश पाटील, सह मुख्य कार्यकारी अधिकारी निळकंठ पोमण, कार्यकारी अभियंता बापूसाहेब गायकवाड यांनी पुरस्कार स्वीकारले.
“ओपन डेटा वीक इव्हेंटमध्ये’ पिंपरी-चिंचवडने सर्वोत्कृष्ट कामगिरी केली. तर, प्लेस मेकींग या प्रकारात 75 तासांत तयार करण्यात आलेल्या सुदर्शन चौकातील 8 टू 80 पार्क ला प्लेस मेकींग मॅरेथॉन विजेता पुरस्काराने सन्मानित करण्यात आले. तसेच, ऊर्जा आणि हरित इमारती, शहरी नियोजन, हरित आवरण आणि जैवविविधता, गतिशीलता आणि हवेची गुणवत्ता, जल व्यवस्थापन आणि कचरा व्यवस्थापन या पाच श्रेणींमध्ये ठरवून दिलेल्या 28 निकषांनुसार चांगली कामगिरी केल्यामुळे क्लायमेट स्मार्ट सिटीज असेसमेंट फ्रेमवर्क 2.0 मध्ये 5 पैकी 4 स्टार मिळवून पर्यावरण संतुलन राखण्यात मोलाची कामगीरी केल्याबददल क्लायमेट चेंज पुरस्काराने सन्मानित करण्यात आले आहे. पिंपरी-चिंचवड स्मार्ट सिटीची ओपन डेटा वीक इव्हेंटमध्ये “सर्वोत्कृष्ट कामगिरी करणाऱ्यांपैकी एक’ म्हणून निवड झाली आहे.