India vs Bangladesh T20 Series :- भारतीय महिला संघ बांगलादेश दौऱ्यासाठी सज्ज झाला असून येत्या 28 एप्रिलपासून बांगलादेश विरुद्ध भारत असे पाच सामने सिल्हेटमध्ये पार पडणार आहेत. हे तीन सामने हे रात्रीचे असल्याने मुख्य स्टेडियममध्ये पार पडतील तर दोन (दिवसांचे) सामने हे बाहेरील मैदानात होतील. स्थानिक वेळेनुसार रात्रीचे सामने संध्याकाळी 6 वाजून 30 मिनिटांनी सुरु होतील तर दिवसाचे दोन सामने दुपारी 2 ला खेळवले जाणार आहेत. बांगलादेश विरुद्धची ही मालिका सप्टेंबर-ऑक्टोबरमध्ये बांगलादेशमध्येच खेळवल्या जाणाऱ्या टी-20 विश्वकरंडक स्पर्धेची तयारी असल्याने भारतीय संघाच्या खेळीकडे सर्वांचेच लक्ष असणार आहे.
मागील दोन वर्षांतील भारताचा हा दुसरा बांगलादेश दौरा आहे आणि एकूण तिसरा दौरा आहे. 2023 मध्ये, भारतीय संघाने तीन टी-20 आणि एकदिवसीय सामने खेळले होते. यामध्ये टी-20 मालिका 2-1 ने त्यांना आपल्या नावे करता आली होती मात्र एकदिवसीय मालिकेत दोन्ही संघांनी 1-1 अशी बरोबरी केली होती. हा एकदिवसीय सामना लक्षात राहण्याचे एक कारण म्हणजे एकदिवसीय मालिकेतील या शेवटच्या सामन्यात भारताची कर्णधार हरमनप्रीत कौर हिने पंचांवर टीका करताना तिच्या बॅटने स्टंप फोडले होते. सामन्यानंतरही तिने पंचांचे निर्णय हे कीव येण्यासारखे होते असे म्हणले होते. भारताची उपकर्णधार स्मृती मानधाना हिनेही पुढील दौऱ्यासाठी तटस्थ पंच मिळतील अशी अपेक्षा व्यक्त केली होती.
पुढच्या वेळी जेव्हा आम्ही बांगलादेशात येणार आहोत तेव्हा आम्हाला खात्री करून घ्यावी लागेल की आम्हाला अशा प्रकारच्या पंचगिरीला सामोरे जावे लागेल आणि त्यानुसार आम्हाला स्वतःला तयार करावे लागेल, असे हरमनप्रीत म्हणाली होती. तिच्या या कृतींमुळे तिच्यावर आयसीसीने दोन सामन्यांची बंदी सुद्धा घातली होती.
या प्रसंगानंतर आता पहिल्यांदाच भारतीय संघ 23 एप्रिलला बांगलादेशात पोहोचणार आहे. यावेळचा दौरा भारतीय संघाच्या कामगिरीमुळे गाजणार की पुन्हा असे वादग्रस्त प्रसंग पाहायला मिळणार हे 28 एप्रिलपासून आपल्याला पाहायला मिळेल.
बांगलादेश दौऱ्याचे वेळापत्रक
– 28 एप्रिल – पहिला सामना (रात्री)
– 30 एप्रिल – दुसरा सामना (रात्री)
– 2 मे – तिसरा सामना (दिवस)
– 6 मे – चौथा सामना (दिवस)
– 9 मे – पाचवा सामना (रात्री)