पुणे – कोरोना लस उपलब्ध नसल्याने लसीकरण केंद्र बंद असल्याचा फायदा घेत चोरट्याने लसीकरण केंद्रात शिरुन चोरी केल्याचे समोर आले आहे. कर्वेनगरमधील शाहु कॉलनीमधील नियोजन शाळा येथे 23 व 24 ऑगस्ट दरम्यान हा प्रकार घडला.
याप्रकरणी समर्थ पवार (वय 20, रा. वारजे माळवाडी) यांनी वारजे पोलिसांकडे फिर्याद दिली आहे. त्यानुसार अज्ञात चोरट्याच्या विरुद्ध घरफोडीचा गुन्हा दाखल करण्यात आला आहे.
पोलिसांनी दिलेल्या माहितीनुसार, पवार हे महापालिकेच्या आरोग्य विभागात मनपा शाळेतील कोविड लसीकरण केंद्रात नोकरी करतात. सध्या कोविडची लस उपलब्ध नसल्याने हे लसीकरण केंद्र बंद आहे. लसीकरण केंद्रासाठी महापालिकेने एक संगणक दिला असून तो शाळेतील जिनाच्या बाजूला असलेल्या खोलीत ठेवला होता. चोरट्याने या खोलीचे कडीकोयंडा उचकटून कडी कोयंड्याचा बॉक्स व संगणक असा 60 हजार रुपयांचा माल चोरुन नेला.