पुणे – करोना लसीकरणासाठी आरोग्य कर्मचाऱ्यांना प्रशिक्षण दिले जात आहे. लोकसंख्येच्या प्रमाणात उपलब्ध लस टोचणाऱ्या कर्मचाऱ्यांची संख्या पाहता 90 ते 100 दिवस एवढा कालावधी लस टोचण्यासाठी लागू शकतो. जिल्हा परिषदेने तयार केलेल्या अहवालातून हे स्पष्ट झाले आहे. पहिल्या टप्प्यात जिल्ह्यात 1 लाखाहून अधिक कर्मचाऱ्यांना लस देण्यात येणार आहे.
शासनाच्या मार्गदर्शक सूचनांनुसार पहिल्यांदा जिल्ह्यातील सर्व आरोग्य कर्मचाऱ्यांना लस दिली जाणार आहे. तर, दुसऱ्या टप्प्यात इतर संलग्न आजार असलेल्या आणि वयोवृद्धांना प्राधान्य देण्यात येणार आहे. पुणे जिल्ह्यामध्ये 253 शासकीय आरोग्य संस्था आणि 8 हजार 89 खासगी आरोग्य संस्था अशा एकूण 8 हजार 340 संस्था आहेत.
यामध्ये 24 हजार 739 शासकीय कर्मचारी आणि 85 हजार 695 खासगी कर्मचारी असे एकूण 1 लाख 10 हजार 434 कर्मचारी कार्यरत आहेत. लसीकरणासाठी पुणे जिल्हा ग्रामीणमध्ये 827 लस टोण्यासाठी कर्मचाऱ्यांची नियुक्‍ती करण्यात येणार आहे. दोन डोस 28 दिवसांच्या अंतराने देण्यात येणार आहेत. लसीच्या साठवणीसाठी 185 शीतगृह आणि 157 डीफ्रीजर उपलब्ध आहेत.
