-अशोक सुतार
युरोपमधील सर्वात लोकप्रिय कार्निव्हल म्हणून लंडन येथील नॉटिंगहिल कार्निव्हलचा उल्लेख केला जातो. ब्राझिलियन साम्बा ब्लॉक्स, लंडन स्कूल ऑफ साम्बा आणि पॅराइसो स्कूल ऑफ साम्बा इ. स्कूलतर्फे परेडमध्ये संगीताचे विविध कार्यक्रम घेतले जातात. ब्राझीलच्या कार्निव्हलची शैली लंडनमधील नॉटिंगहिल कार्निव्हलमध्ये दिसून येते. नॉटिंगहिल कार्निव्हलला जगभरातील रसिकांचा मोठा प्रतिसाद मिळत असून सध्या 25 लाख लोकांची उपस्थिती असते तर 40 हजार स्वयंसेवक असतात आणि 9 हजार पोलिसांचा बंदोबस्त असतो. जगातील सर्वात मोठा स्ट्रीट फेस्टिव्हल म्हणून या कार्निव्हलची ओळख आहे.
या कार्निव्हलमध्ये सॉका संगीत, कॅलिप्सो संगीत, स्टीलपेन संगीत प्रसिद्ध आहे. संगीताचे चाहते या कार्निव्हलसाठी जगभरातून लंडन येथे येतात. लाडब्रोक ग्रोव्ह, लंडन येथे हा कार्निव्हल घेतला जातो. 1966 साली क्लाउडिया जोन्स, रॅनेल सलेट यांनी नॉटिंगहिल कार्निव्हलची सुरुवात केली. यावर्षी 30 व 31 ऑगस्ट 2020 रोजी कार्निव्हल येत आहे. या कार्निव्हलची तयारी आणि संगीत, परेडचा सराव आतापासूनच सुरू झाला आहे. 1977 साली दंगलीमुळे कार्निव्हलबद्दल वातावरण नकारात्मक झाले होते. प्रिन्स चार्ल्स यांनी त्यावेळी हा कार्निव्हल पुढे सुरू ठेवण्यास पाठिंबा दिला होता.
लंडनचे तत्कालीन महापौर केन लिव्हिंग्स्टोन यांनी 2004 मध्ये हायड पार्कवर कार्निव्हल करण्यासाठी शिफारस केली. 2002मध्ये, नॉटिंगहिल कार्निव्हलच्या लंडन डेव्हलपमेंट एजन्सीने दिलेल्या अहवालात असे म्हटले आहे की, लंडन आणि ब्रिटनच्या अर्थव्यवस्थेत या कार्यक्रमाच्या सुमारे 93 दशलक्ष डॉलर्सचा वाटा होता. एखाद्या देशाच्या अर्थव्यवस्थेत कार्निव्हलमधील उलाढालीचा मोठा वाटा असणे विशेष आहे.
लंडनमध्ये कॅरिबियन संस्कृती आणि परंपरा साजरे करून प्रथम नॉटिंगहिल कार्निव्हल 1966 मध्ये आयोजित केले गेले होते. या कार्निव्हलमध्ये 30हून अधिक जगप्रसिद्ध साउंड सिस्टम पाहण्यास मिळतात. अनेक लोक विविध पोषाखांत बॅंडमध्ये सामील होऊन नृत्य, गाणे सादर करतात. तसेच विविध मुखवटे घालण्याची पद्धत याही कार्निव्हलमध्ये आहे. रस्त्यावरील परेडमध्ये एकपात्री शो, नृत्य नाटिका यांची रेलचेल असते. हा कार्निव्हल जगप्रसिद्ध होण्याचे कारण म्हणजे लंडन येथील कार्निव्हलचे योग्य व्यवस्थापन आणि सर्वप्रकारचे पाश्चात्य संगीत व गायनाचे कार्यक्रम होय.