नवी दिल्ली :- आशियाई हॉकी फेडरेशन आणि हॉकी इंडिया यांनी झारखंड येथे होणाऱ्या आशियाई महिला अजिंक्यपद हॉकी स्पर्धेचे वेळापत्रक जाहीर केले आहे. त्यात यजमान भारतीय महिला हॉकी संघाचा सलामीचा सामना थायलंडशी होणार आहे. पहिल्या दिवशी मलेशिया आणि जपान यांच्यातील पहिल्या सामन्याने या स्पर्धेचा प्रारंभ होणार आहे.
येत्या 27 ऑक्टोबरला तिसरा सामना यजमान भारत आणि थायलंड यांच्यात मरांग गोमके जयपाल सिंह हॉकी स्टेडियम येथे होणार आहे. या स्पर्धेत कोरिया, मलेशिया, थायलंड, जपान, चीन आणि यजमान भारत हे सहा संघ सहभागी झाले असून राउंड रॉबीन पद्धतीने ही स्पर्धा होणार आहे. स्पर्धा 27 ऑक्टोबर ते 5 नोव्हेंबर या कालावधीत होत आहे.
गटसाखळीत सर्व संघ एकमेकांशी खेळणार असून अव्वल चार संघ उपांत्यफेरीसाठी पात्र ठरतील. गुणतालिकेतील प्रथम क्रमांकाचा संघ चौथ्या क्रमांकावरील संघाशी तर दुसऱ्या क्रमांकावरील संघ तिसऱ्या क्रमांकाच्या संघाशी खेळेल. या स्पर्धेतील सहा मोसमांत 2010, 2011 व 2016 असे तीनवेळा कोरियाने विजेतेपद पटकावले होते.
बर्मिंगहॅमला झालेल्या राष्ट्रकुल स्पर्धेत ऐतिहासिक ब्रॉंझपदक तसेच एफआयएच महिला हॉकी नेशन्स करंडक स्पर्धेत विजेतेपद मिळवल्यावर आता यजमान भारतीय संघाला विजेतेपद मिळवण्याची संधी आहे. यापूर्वी भारतीय महिला हॉकी संघाने आशियाई अजिंक्यपद करंडक स्पर्धेत 2016 साली विजेतेपद मिळवले होते.