रांजणगाव गणपती – रांजणगाव गणपती येथील औद्योगिक वसाहतीमध्ये कंपन्या सुरू करण्यास शासनाने परवानगी देऊ नये, असा आक्रमक पावित्रा परिसरातील पदाधिकाऱ्यांनी घेतला आहे. शासन आदेश जाहीर होताच ठेकेदारांच्या हालचाली गतीमान झाल्या आहेत. कंपन्या सुरू होणार असल्यामुळे लॉकडाऊनच्या काळात कामगारांना वाऱ्यावर सोडलेल्या ठेकेदारांनी कामगारांची जुळवाजुळव करण्याचा सपाटा लावला आहे. तसेच दमबाजी करण्याचे प्रकार सुरू आहेत. रांजणगाव परिसरातील कंपन्या सुरू करू नका, असे निवेदन जिल्हाधिकाऱ्यांना देण्यात येणार असल्याचे रांजणगाव गणपती, कारेगाव, ढोकसांगवी येथील सरपंचांनी सांगितले आहे.
शासनाच्या शनिवार (दि. 18) आदेशानुसार पुणे ग्रामीण पोलिसांच्या वतीने दौंड विभागाच्या उपविभागीय अधिकारी ऐश्वर्या शर्मा यांनी रांजणगाव औद्योगिक वसाहतीमधील विविध कंपन्यांच्या प्रतिनिधींबरोबर संवाद साधून शासनाच्या नियमांचे पालन करून कंपनी सुरू करण्यास सांगितले. मात्र, यावेळी पोलीस प्रशासनाने स्थानिक ग्रामपंचायतीचे प्रतिनिधींबरोबर मिटिंग करणे गरजेचे होते.
कारण औद्योगिक वसाहतीमध्ये कामाला येणारे बहुतांश कामगार हे लॉकडाऊनमध्ये वेळेत गावाला न जाता आल्याने परिसरात अडकून पडले आहेत. स्थानिक ग्रामपंचायत प्रशासन व दानशूर नागरिक कामगारांना जेवण उपलब्ध करून देत आहेत. मात्र, ज्या कामगारांच्या कष्टावर कंपन्या व ठेकेदार गब्बर झाले आहेत. त्यांनी कामगारांना वाऱ्यावर सोडले आहे. अशा ठेकेदार व कंपन्यांवर ही प्रशासनाने कारवाई करावी, अशी मागणी केली जात आहे.
दरम्यान, नामांकित कंपन्यानी कामगांराना घरपोच डबे दिले तर काही कंपन्यांनी ग्रामपंचायत प्रशासनाला अन्नदानात सहकार्य केले आहे. कंपन्या सुरू होऊ नये, याबाबत आपण यापूर्वी जिल्हाधिकाऱ्यांशी पत्रव्यवहार केल्याचे कारेगावचे सरपंच अनिल नवले यांनी सांगितले.
ठेकेदारांकडून कामगारांना दमबाजी
कंपन्या सुरू होणार अशी माहिती मिळताच महिनाभर गायब झालेले अनेक ठेकेदार आज कामगारांना फोन करू लागले आहेत. कामावर येण्याची तंबी देऊ लागले आहेत. मात्र, ज्या कंपन्यांनी व ठेकेदारांनी अडचणीत मदत केली नाही. त्यांच्याकडे कामाला न गेलेलेच बरे, अशी बोलकी प्रतिक्रिया कामगार देत आहेत. औद्योगिक वसाहतीमध्ये येणारा कामगार हा पुणे शहर, पिंपरी-चिंचवड शहर, पुणे ग्रामीण व अहमदनगर जिल्ह्यातून ये-जा करीत आहेत.
काही कामगार रांजणगाव गणपती, कारेगाव, ढोकसांगवी हद्दीतून कामाला ये-जा करणार आहेत. त्यामुळे ज्या कंपन्या व ठेकेदार अडचणीत कामगारांना साधे दोनवेळचे जेवण देऊ शकत नाही. त्या कामगारांना सुविधा काय पुरवणार आहेत. त्यामुळे कंपन्या बंदच राहणे हिताचे असल्याचे रांजणगावचे सरपंच सर्जेराव खेडकर यांनी सांगितले.
शासन आदेशाचे नियम पायदळी
शासनाच्या आदेशानुसार ज्या काही कंपन्या सुरू आहेत. त्या कंपन्याही शासनाचे आदेश पाळत नसल्याचे निदर्शनास आले आहे. त्यामुळे या कंपन्याही बंद करण्यात याव्यात, अशी मागणी सर्व सरपंचांनी केली आहे. रांजणगाव औद्योगिक वसाहत पूर्णत: बंद करण्यात यावी, या मागणीसाठी रांजणगाव, कारेगाव, ढोकसांगवी ग्रामपंचायतच्या वतीने जिल्हाधिकाऱ्यांशी पत्रव्यवहार करण्यात येणार असल्याचे सरपंच सर्जेराव खेडकर, अनिल नवले, शोभा शेलार यांनी सांगितले आहे.
परिसरामध्ये कंपन्या सुरू झाल्यावर जर एखादा रुग्ण सापडला तर मोठी हानी पोहचू शकते. त्यामुळे औद्योगिक वसाहती त्वरित बंद करण्यात यावी, अशी मागणी परिसरातील पदाधिकाऱ्यांनी केली आहे.