Brij Bhushan Sharan Singh – दिल्ली न्यायालयाने भाजप खासदार ब्रिजभूषण शरण सिंह यांच्यावर आरोप निश्चित करण्याचे आदेश दिले आहेत. या प्रकरणी ब्रिजभूषण शरण सिंह यांच्यावर आरोप निश्चित करण्यासाठी पुरेसे पुरावे असल्याचेही न्यायालयाने म्हटले आहे. कुस्ती महासंघाचे माजी प्रमुख ब्रिजभूषण शरण सिंग यांच्यावर महिला कुस्तीपटूंच्या लैंगिक छळाचा गुन्हा दाखल आहे. आता या प्रकरणी त्यांच्यावर आरोप निश्चित करण्याचे न्यायालयाने म्हटले आहे. (Six female wrestlers sexual harassment case Delhi court has ordered framing of charges against BJP MP Brij Bhushan Sharan Singh )
ब्रिजभूषण व्यतिरिक्त त्यांचे सहकारी विनोद तोमर यांच्यावरही आरोप निश्चित केले जाणार आहेत. सहा महिला कुस्तीपटूंनी दोघांवर लैंगिक छळाचे आरोप केले होते. या दोघांविरुद्ध कलम 354 आणि 354A अंतर्गत 5 महिला कुस्तीपटूंचा लैंगिक छळ केल्याप्रकरणी आरोप निश्चित करण्यात येणार आहेत. याशिवाय, दोन महिला कुस्तीपटूंचा छळ केल्याप्रकरणी कलम 506 (भाग 1) अंतर्गत आरोप निश्चित केले जातील.
सहाव्या महिला कुस्तीपटूचा छळ केल्याप्रकरणी त्यांची निर्दोष मुक्तता करण्यात आली आहे. आता या प्रकरणाची सुनावणी 21 मे रोजी होणार आहे. याआधी मंगळवारी राऊस ॲव्हेन्यू कोर्टाच्या न्यायाधीश प्रियंका राजपूत यांनी निर्णय राखून ठेवला होता. न्यायालयाने सांगितले की, निकाल तयार आहे, परंतु त्याच्या प्रतीमध्ये काही दुरुस्त्या कराव्या लागतील. त्यामुळे आता पुढील सुनावणी 10 मे रोजी होणार आहे. या प्रकरणी ब्रिजभूषण शरण सिंह यांनीही आधी या प्रकरणाची अधिक चौकशी करावी, असे आवाहन केले होते. त्यानंतरच आरोप निश्चित करावेत.
त्यावर न्यायालयाने आम्ही विचार करू, असे सांगितले होते, मात्र पुढील सुनावणीत तसे करण्यास नकार दिला. ब्रिजभूषण शरण सिंह यांनी दावा केला होता की, ज्या दिवशी आपल्यावर लैंगिक छळाचा आरोप झाला त्या दिवशी आपण दिल्लीत नव्हतो. ते सर्बियाला गेले होते. याशिवाय त्यांनी प्रशिक्षक विजेंदरचे कॉल डिटेल रेकॉर्डही सादर केले होते. दरम्यान, ब्रिजभूषण शरण सिंह सध्या कैसरगंज लोकसभा मतदारसंघातून भाजपचे खासदार आहेत, मात्र यावेळी त्यांना संधी मिळालेली नाही. त्यांच्याऐवजी त्यांचा मुलगा करण भूषण सिंग यांना भाजपने तिकीट दिले आहे.
