ॲमेझॉन कंपनीवर अनेक ग्राहक विविध वस्तु ऑनलाइन खरेदी करणे पसंत करतात. मात्र ऑनलाइन खरेदी केल्याने काही ग्राहकांची फसवणूक झाल्याचे वृत्त देखील या समोर आले आहेत. यातच आता ग्राहकाला बनावट घड्याळ विकणे ॲमेझॉन कंपनीला चांगलेच महागात पडले आहे. याप्रकरणी मुख्य न्याय दंडाधिकारी न्यायालयाने कळमना पोलिस ठाण्याला ॲमेझॉन कंपनीविरोधात फसवणुकीचा गुन्हा दाखल करण्याचे आदेश दिले आहेत. त्यामुळे ग्राहकांची फसवणूक केल्याने ॲमेझॉनला चांगलाच दणका बसला आहे.
नेमकं काय आहे प्रकरण ?
परमजितसिंग कलसी यांनी कंपनी विरोधात न्यायालयात धाव घेतली आहे.कलसी यांनी ब्रँडेड कंपनीचे घड्याळ स्वस्त दरात विकत घेण्यासाठी इंटरनेटवर शोधा-शोध केली. त्यांना आवडलेले १ हजार ८९८ रुपयांचे घड्याळ ॲमेझॉन कंपनीच्या वेबसाइटवर त्यांना उपलब्ध दिसले. एम. के. मार्केटिंग कंपनी ॲमेझॉन च्या माध्यमातून हे घड्याळ विकत होती. त्यावेळी स्विझरलँड येथील ब्रँडेड रेडो कंपनीच्या त्या घडाळ्याचे सुंदर-सुंदर फोटोसुद्धा त्यांना पाहायला मिळाले. कलसी यांच्याकडे ॲमेझॉनचे वार्षिक सबस्क्रिप्शनसुद्धा असल्याने १९ डिसेंबर २०२१ रोजी ऑनलाइन पैसे जमा करीत त्यांनी ते घड्याळ ऑर्डर केले.
त्यानंतर दिल्ली येथील एम के मार्केटींगने ती ऑर्डर स्वीकारली आणि 23 तारखेला ते घडयाळ त्यांना मिळाले. मात्र घड्याळाचे पॅकेट उघडतातच कलसी कुटुंबीयांच्या उत्साहावर पाणी फेरले. कारण यात ब्रँडेड ऐवजी सर्वसाधारण घड्याळ त्यांना प्राप्त झाले होते. घड्याळ ब्रँडेड असूनही त्या कंपनीचे वॉरंटी कार्ड देखील त्यांना सोबत मिळाले नाही. फसवणूक झाल्याचे लक्षात येताच त्यांनी कळमना पोलिस ठाण्यात धाव घेतली.
परंतु, पोलिसांनी कुठलाही गुन्हा दाखल न केल्याने कलसी यांनी ॲमेझॉन आणि विक्रेत्या विरोधात त्यांनी न्यायालयात धाव घेत अर्ज दाखल केला. दरम्यान, कलसी यांनी ऑर्डर केलेले घड्याळाची किंमत एक लाख रुपयांच्यावर आहे. परंतु ॲमेझॉनने घडयाळाचे चांगले फोटो दाखवत ते कमी दरात मिळत असल्याचे दाखवले. त्यानंतर आता कळमना पोलिसांना तपासकरीत याचा नियमानुसार अहवाल दाखल करण्याचे आदेश देत अर्ज निकाली काढला.
