लंडन : आधुनिक काळातील प्रगतीची दुसरी बाजू म्हणून नेहमी प्रदूषणाकडे पाहिले जाते सर्वच प्रकारचे प्रदूषण मानवी जीवनासाठी धोकादायकच मानले जाते. आता एका नवीन संशोधनाप्रमाणे हवेच्या प्रदूषणामुळे फक्त फुफुसांनाच धोका निर्माण होतो असे नाही तर मेंदूला सुद्धा धोका होतो आणि त्यातूनच डिप्रेशनसारखे विकार उद्भवू शकतात.
नेटवर्क ओपन जर्नल आणि जामा सायकॉलॉजिकल जर्नल या नियतकालिकांनी याबाबतचे संशोधन केले असून त्याचे निष्कर्ष नुकतेच त्यांनी प्रसिद्ध केले आहेत. नेटवर्क ओपनच्या संशोधनाप्रमाणे जर माणूस दीर्घकाळ हवेच्या प्रदूषणाच्या संपर्कात राहिला तर त्याचा थेट परिणाम त्याच्या मेंदूवर होतो आणि डिप्रेशनसारखे विकार उद्भवू शकतात. याचा जास्त फटका वयस्कर नागरिकांना बसतो.
जामा नियतकालिकाने केलेल्या संशोधनाप्रमाणे हवेच्या प्रदूषणामुळे जे कण निर्माण होतात त्याचा थेट परिणाम मेंदूवर होत असून त्यातूनच डिप्रेशन किंवा चिंताग्रस्तपणा आणि वैफल्यग्रस्तपणा यासारखे रोग उद्भवू शकतात.
या संशोधनामध्ये 90 लाखापेक्षा जास्त जेष्ठ नागरिकांची पाहणी करण्यात आली. 2016 ते 19 या कालावधीमध्ये 15 लाख पेक्षा जास्त वयस्कर नागरिकांमध्ये डिप्रेशनची लक्षणे आढळली. हवेच्या प्रदूषणाची तीव्रता अशाच प्रकारे वाढत चालली तर फक्त वयस्कर नागरिक नव्हे तर तरुणांमध्ये सुद्धा अशी लक्षणे दिसू शकतात, असा इशारा संशोधकांनी दिला आहे.
