मुंबई : दीर्घकाळाच्या राजकीय वैरानंतर ठाकरे कुटुंबातील दोन मोठे नेते – शिवसेना (उद्धव बाळासाहेब ठाकरे) पक्षप्रमुख उद्धव ठाकरे आणि महाराष्ट्र नवनिर्माण सेना (मनसे) अध्यक्ष राज ठाकरे – यांनी मुंबई महानगरपालिका (बीएमसी) निवडणुकीसाठी अधिकृत युती जाहीर केली आहे. २४ डिसेंबर रोजी मुंबईत झालेल्या संयुक्त पत्रकार परिषदेत दोन्ही नेत्यांनी ही घोषणा केली. ही युती मुंबईसह नाशिक आणि इतर महापालिकांमध्येही लागू होईल. या युतीमुळे मराठी माणसाच्या हितासाठी आणि मुंबईला महाराष्ट्रापासून तोडण्याच्या कटाला आळा घालण्यासाठी एकत्र येत असल्याचे उद्धव ठाकरे यांनी स्पष्ट केले. पत्रकार परिषदेत राज ठाकरेंचा ‘दानवे’ टोला पत्रकार परिषदेत एका पत्रकाराने उद्धव ठाकरेंना भाजपाचे ज्येष्ठ नेते रावसाहेब दानवे यांच्या विधानाबाबत प्रश्न विचारला. दानवे यांनी यापूर्वी सांगितले होते की, ही उद्धव ठाकरेंची शेवटची निवडणूक असून, त्यानंतर त्यांच्याकडे कार्यकर्तेच राहणार नाहीत. हा प्रश्न उद्धव ठाकरेंना विचारला जात असताना राज ठाकरे यांनी त्यांच्या हातातून माईक घेतला आणि हसत हसत म्हणाले, “मला असं वाटतं की उत्तरं देवाला द्यावीत, दानवांना नाही.” या वाक्यावर उपस्थितांमध्ये एकच हशा पिकला. राज ठाकरेंच्या या खणखणीत टोल्याने दानवे यांचे आडनाव ‘दानवे’ असल्याने थेट निशाणा साधला गेला.उद्धव ठाकरे यांनीही दानवे यांच्यावर टीका करताना म्हटले की, त्यांना आता त्यांच्याच पक्षात कोणी विचारत नाही. मात्र राज ठाकरेंनी उद्धव यांच्या मदतीला धावून येत हे प्रकरण एका वाक्यात संपवले. रावसाहेब दानवेंचा जोरदार पलटवार या टोल्यावर भाजपाचे माजी केंद्रीय मंत्री रावसाहेब दानवे यांनी एका चॅनेलला दिलेल्या मुलाखतीत कठोर प्रत्युत्तर दिले. ठाकरे बंधू एकत्र आल्याबद्दल आनंद असल्याचे सांगताना दानवे म्हणाले, “दोघांनी पुढच्या काळात पुन्हा विभक्त होण्याची पाळी येऊ नये, असं वागावं. २०१९ आणि २०२४ च्या निवडणुकीनंतर उद्धव ठाकरेंनी अनैसर्गिक युती केली. भाजप सोडून ते काँग्रेस-राष्ट्रवादीबरोबर गेले. त्यांचं अडीच वर्षांचं सरकार राज्यातील लोकांना आवडलं नाही, सत्तांतर झालं. त्यांचे एक-एक शिलेदार त्यांना सोडून गेले. एकीकडे युतीची पत्रकार परिषद सुरू होती, दुसरीकडे कार्यकर्ते त्यांना सोडून जात होते.” उद्धव ठाकरेंनी दानवे यांना पक्षात कोणी विचारत नाही अशी टीका केल्यावर दानवे म्हणाले, “भाजपाने मला सभापती, आमदार, खासदार, दोनदा केंद्रात मंत्री आणि राज्यात पक्षाध्यक्ष केलं. मला जर पक्षात कोणी विचारत नसतं तर असं केलं असतं का? माझा मुलगा तिसऱ्यांदा आमदार आहे. उद्धव ठाकरेंसारखा काळा बुरखा घालून, शेपुट खाली घालून मी विधान परिषदेत गेलो नाही. मी खरा वाघ आहे, त्यांच्यासारखा कागदी वाघ नाही. मी डरकाळ्या मारत विधानसभेत आणि लोकसभेत गेलो.” आणि राज ठाकरेंच्या ‘दानव’ टोल्यावर दानवे म्हणाले, “दोन्ही भावांवर एकदाच टीका नको. त्यांचं एकदा होऊन जाऊ द्या.” त्यांनी आपले पूर्वीचे भाकीत पुन्हा सांगितले की, हे पक्ष निवडणुकीनंतर अस्तित्वात राहणार नाहीत, कारण कार्यकर्ते त्यांना सोडून जातील.
