मुंबई : महाराष्ट्र विधानसभेच्या पावसाळी अधिवेशनादरम्यान (३० जून ते १८ जुलै २०२५) घडलेल्या खळबळजनक राड्याच्या प्रकरणात विधानसभा विशेषाधिकार समितीने मोठी कारवाईची शिफारस केली आहे. राष्ट्रवादी काँग्रेस (शरद पवार गट) चे आमदार जितेंद्र आव्हाड आणि भाजपचे आमदार गोपीचंद पडळकर यांच्या समर्थकांमधील धक्काबुक्की प्रकरणी समितीचा अहवाल आज (१२ डिसेंबर २०२५) सभागृहात सादर करण्यात आला. या घटनेमुळे विधानभवनाच्या प्रतिमेला धक्का बसला असल्याचे नमूद करत समितीने दोन्ही कार्यकर्त्यांना कठोर शिक्षेची शिफारस केली आहे. १७ जुलै २०२५ रोजी विधानभवनाच्या लॉबीत घडलेल्या या राड्यात आव्हाड समर्थक नितीन देशमुख आणि पडळकर समर्थक ऋषिकेश टकले यांच्यात जोरदार हाणामारी झाली होती. या प्रकरणाची गहन चौकशीसाठी समितीने एकूण १० बैठका घेतल्या आणि दोघांचे साक्ष व पुरावे नोंदवले. समितीने दोघांनाही विधानसभा नियमांचे उल्लंघन केल्याबद्दल २ दिवसांच्या कारावासाची शिक्षा सुनावली आहे. तसेच, २०२९ पर्यंत विधानभवनात प्रवेशबंदी घालण्याची शिफारसही केली आहे. अहवालात विधानभवनाच्या सुरक्षेसाठी कडक नियमावली लागू करण्याचे आणि अभ्यागतांच्या पोलीस पडताळणीची सक्तीची अंमलबजावणी करण्याचे निर्देश देण्यात आले आहेत. विधानसभा अध्यक्ष राहुल नार्वेकर यांनी या अहवालाची गंभीर दखल घेतली असून, दोन्ही आमदारांना त्यांच्या कार्यकर्त्यांना विधानभवनात आणण्याबाबत जबाबदारी स्वीकारण्यास सांगितले आहे. या कारवाईमुळे राजकीय वातावरणात तणाव वाढण्याची शक्यता आहे.
