सातारा, (प्रतिनिधी) – सातारा शहरात स्थानिक फळांसह जिल्ह्याबाहेरुन तसेच परराज्यातूनही फळांची आवक होत आहे. सध्या कलकत्ता, पश्चिम बंगाल येथून लिची फळांची मोठ्या प्रमाणात आवक झाली आहे. लाल चुटूक लिचीची फळे सातारकरांचे लक्ष वेधत असून ग्राहकांच्या पसंतीस उतरत आहे.
सध्या उन्हाळा असल्याने रसदार फळांना मागणी वाढली आहे. त्यामुळे फळबाजर सध्या तेजीत आहे. स्थानिकस्तरावर उपलब्ध फळांसह परजिल्हा व पर राज्यातूनही फळांची आवक होवू लागली आहे.
फळांचा राजा आंब्याचीदेखील मोठ्या प्रमाणावर आवक झाली असून दरात घासाघीस करुन नागरिकांकडून खरेदी केली जात आहे. त्याबरोबर लिची हे परप्रांतीय फळही सातारा शहरातील फळविक्रेत्यांकडे मोठ्या प्रमाणावर दिसत आहे.
फळे कलकत्त्याहून थेट विमानाने पुणे येथे येतात व पुण्यातून सातारा, सांगली, सोलापूर या जिल्ह्यांमध्ये विक्रीसाठी पाठवण्यात येतात. सातारा शहरातील राजवाडा, राजपथ परिसरात अनेक फळविक्रेत्यांकडे ही लिची उपलब्ध झाली आहे.
दरवर्षी पावसाळा सुरू झाला की या फळांचा हंगाम सुरू होतो. टणक असे फळाचे आवरण काढल्यानंतर आत असलेला रसदार गाभा खाण्याचा आनंद काही वेगळाच,त्यामुळे दर जास्त असले तरी या फळांना मागणी कायम आहे.
