नवी दिल्ली – अयोध्येतील (Ayodhy) बहुचर्चित राम मंदिराच्या (Ram Mandir) तळमजल्याचे बांधकाम येत्या डिसेंबर महिन्याच्या अखेरपर्यंत पूर्ण होणार असून मंदिरात 22 जानेवारीला प्राणप्रतिष्ठापना होण्याची शक्यता आहे, असे राम मंदिर (Ram Mandir) बांधकाम समन्वय समितीचे अध्यक्ष नृपेंद्र मिश्रा यांनी सांगितले.
राम मंदिराच्या प्राणप्रतिष्ठापनेसाठी पंतप्रधान नरेंद्र मोदी उपस्थित राहण्याची शक्यता आहे. हा सोहळा दिनांक 20 ते 24 जानेवारी दरम्यान होण्याची शक्यता आहे. पंतप्रधानांच्या वेळापत्रकानुसार अंतिम तारीख निश्चित केली जाणार असल्याचेही मिश्रा यांनी वृत्तसंस्थेला दिलेल्या मुलाखतीत सांगितले.
मंदिराच्या उद्घाटनाच्या समारंभासाठी श्री राम जन्मभूमी तीर्थक्षेत्र ट्रस्टच्या माध्यमातून पंतप्रधानांना विधीवत निमंत्रण दिले जाणार आहे. या समारंभादरम्यान राम ललाची मूर्ती मंदिराच्या गाभाऱ्यात विधीवत प्रतिष्ठापित केली जाणार आहे. एकूण 10 दिवस चालणाऱ्या या सोहळ्याला 14 जानेवारी, मकर संक्रांतीपासून सुरुवात होणार आहे.
प्राणप्रतिष्ठापनेनंतर भाविकांसाठी मंदिर 24 जानेवारीपासून खुले होण्याची शक्यता आहे. उद्घाटनाच्या समारंभाचे नियोजन करण्यासाठी ट्रस्टचे सरचिटणीस चंपत राय यांच्या अध्यक्षतेखाली एक समिती नियुक्त करण्यात आली आहे. या समारंभाला उपस्थित राहण्यासाठी देशभरातून रामभक्त अयोध्येमध्ये येण्याची शक्यता आहे.
राम मंदिराच्या उद्घाटनाचा मुहुर्त 2024 च्या लोकसभा निवडणुका डोळ्यासमोर ठेवून काढला गेला असल्याच्या प्रश्नावर मिश्रा यांनी व्याच्यता केली नाही. मात्र त्यांचे मौन होकार दर्शवत होते.
आतापर्यंत 900 कोटी रुपये खर्च…
मंदिराच्या बांधकामाचा परिसर 2.5 एकरांचा असेल. त्याभोवती परिक्रमा पथ असून त्याच्यासह मंदिराच्या एकूण परिसराचे क्षेत्र 8 एकर असणार आहे. मंदिराच्या 9 ब्रॉंझ पॅनेलद्वारे भगवान रामाने पार पाडलेली 9 कर्तव्ये दशवली जातील.
आतापर्यंत मंदिराच्या बांधकामावर 900 कोटी रुपये खर्च झाला आहे. तर संकुलाच्या एकूण बांधकामासाठी सुमारे 1,700 कोटी ते 1,800 कोटी रुपये खर्च केले जातील असा अंदाज आहे.
कळसामध्ये बसवले जाणार विशेष उपकरण…
मंदिराच्या कळसामध्ये बसवल्या जाणाऱ्या उपकरणाचे डिझाइन सध्या केले जाते आहे. या उपकरणाच्या माध्यमातून दरवर्षी रामनवमीच्या दिवशी सूर्यकिरण थेट गाभाऱ्यातील मूर्तीच्या कपाळावर पडावेत, अशी व्यवस्था केली जाणार आहे.
हे उपकरण बेंगळुरूमध्ये संशोधकांच्या देखरेखीखाली तयार केले जाते आहे. या उपकरणासाठी रुरकी येथील सेंट्रल बिल्डींग रिसर्च इन्स्टिट्युट आणि पुण्यातील संस्थेने मिळून संयुक्तपणे कॉम्प्युटराईज्ड प्रोग्रॅम तयार केला आहे, असेही मिश्रा यांनी सांगितले.