चीनमधील आंदोलनाशी संबंधित असलेले सर्व व्हिडिओ सोशल मीडियावरून हटवण्याचे आदेश चिनी सरकारने दिले आहे.
चीनच्या अध्यक्षपदी जिनपिंग यांची पुन्हा एकदा निवड झाल्यानंतर त्यांच्या झिरो कोविड विरुद्ध चीनमध्ये तसेच इतर देशांतही आंदोलन केले जात आहे. चीनची राजधानी बीजिंग येथे झळकलेल्या पोस्टर्समुळे हे आंदोलन पेटले आहे. आम्हाला पीसीआर टेस्ट नव्हे, तर अन्न हवे आहे. आम्हाला लॉकडाऊन नव्हे, तर स्वातंत्र्य हवे आहे. आम्हाला खोटे बोलणे नकोय,तर सन्मान हवाय. आम्हाला सांस्कृतिक क्रांती नव्हे तर सुधारणा हव्या आहेत. आम्हाला नेता नव्हे, तर मत हवे आहे. आम्हाला गुलाम नव्हे तर नागरिक हवे आहेत, असे या बॅनर्सवर लिहिले आहे.
चीन सरकारने या आंदोलनाशी निगडित असलेले सर्व व्हिडिओ सोशल मीडियावरून हटवण्याचे आदेश दिले. तसेच फोटो आणि या आंदोलनाशी संदर्भ असलेले शब्दही वापरण्यास मनाई करण्यात आली. उदाहरणा दाखल बिजिंग प्रोटेस्टर्स, सिटॉंग ब्रिज अशाप्रकारचे सर्व शब्द सोशल मीडियावरून हटवण्यात आले आहेत. हिरो, करेज, ब्रिज या शब्दांचा सोशल मीडियावर वापर करण्यासही बंदी घालण्यात आली आहे. प्रोटेस्ट सर्च केल्यावर पॉर्नशी संबंधित लिंक्स दिसत आहेत. बीजिंग शहरातील सर्व पुलांवर पोलीस तैनात करण्यात आले आहेत. तसेच ठिकठिकाणी अतिरिक्त सुरक्षा व्यवस्था तैनात करण्यात आली आहे.
व्हॉइस ऑफ सीएन लोकशाहीचं समर्थन करणाऱ्या अज्ञात चिनी नागरिकांचा एक गट असून त्यांचं एक इन्स्टाग्राम अकाउंट आहे. व्हॉइस ऑफ सीएनच्या म्हणण्यानुसार चीनमध्ये हे आंदोलन बीजिंगसोबतच अन्य शहरांमध्येही पसरले आहे. शेंझहेन, बीजिंग, गुआंगझू या शहरांत जिनपिंग यांच्या विरोधात आंदोलन केले जात आहे. या आंदोलनात तरुण, विद्यार्थी सक्रियपणे सहभागी होत असल्याचे दिसत आहे. प्रसाधनगृहांमध्ये या आंदोलनासंदर्भातील पोस्टर्स लावले जात आहेत. प्रसाधनगृहांत सीसीटीव्ही नसल्यामुळे आंदोलकांनी आपला निषेध व्यक्त करण्यासाठी हा मार्ग स्वीकारला आहे. चीनची सेन्सॉरशिप मशीनही सक्रिय झाली आहे. रविवारी मोठ्या संख्येने चिनी भाषेतील ट्विटर खाती लाइव्ह झाली आणि ट्विटर अश्लील फोटो, आक्षेपार्ह व्हिडिओ आणि एस्कॉर्ट सेवांच्या लिंक्सने भरून गेले. ज्या अकाउंटवरून हे सर्व ट्विट करण्यात आले आहे, त्यातील अनेक खाती वर्षापूर्वी तयार करण्यात आली होती किंवा ती निष्क्रिय होती. परंतु, या आठवड्याच्या शेवटी देशभरात निषेध पसरल्यापासून, त्या खात्यांमधून दररोज हजारो पोस्ट शेअर केल्या जात आहेत.
जिथे लॉकडाऊनच्या विरोधात निदर्शने सुरू झाली आहेत, तेथे सोशल मीडिया नेटवर्कवर चिनी भाषेतील शहरांची नावे सर्च करण्यात येत आहेत. यामुळे, सरकार ट्विटरवर या अश्लील पोस्ट त्या शहरांच्या नावाने शेअर करत आहे, जेणेकरून जे लोक ट्विटरवर चीनमध्ये सुरू असलेल्या निदर्शनांची माहिती शोधत आहेत, त्यांचे लक्ष विचलित होईल. 2009 मध्ये सत्ताधारी कम्युनिस्ट पार्टीने चीनमध्ये ट्विटर ब्लॉक केलं होतं. मात्र, देशातील लोक अजूनही व्हीपीएन किंवा वेबसाइट प्रॉक्सी सेवेद्वारे या प्लॅटफॉर्मवर प्रवेश करू शकतात. जर एखाद्या चिनी वापरकर्त्याने काल रात्री चीनमध्ये काय घडले हे शोधण्यासाठी ट्विटरवर सर्च केले तर त्याला आधी एनएसएफडब्ल्यू (नॉट सुटेबल फॉर वर्क) पोस्ट दिसत आहे.
शांघाय आणि बीजिंग या राजधानीसह अनेक प्रमुख चिनी शहरांमध्ये अलीकडच्या काळात निदर्शने झाली. संशोधकांनुसार, पॉर्न पोस्टिंग बॉट खाती सोशल नेटवर्क्सवरील माहितीचा प्रसार रोखण्याच्या सरकारी प्रयत्नांचा एक भाग आहे. स्टॅनफोर्ड युनिव्हर्सिटीतील चिनी-अमेरिकन संशोधक मेंग्यू डोंग, इतर वापरकर्त्यांनी या समस्येला तोंड देण्यासाठी ट्विटरवर सोशल नेटवर्कचे सीईओ ऍलन मस्क यांच्याकडे मदत मागितली आहे. या विरोधादरम्यान, चीनमधील उरुमकी शहरातील एका अपार्टमेंटमध्ये आग लागून दहा जणांचा मृत्यू झाल्यानंतर सरकारच्या शून्य कोविड धोरणा विरोधातील आंदोलन आणखी तीव्र झाले. चीनमधील या सोशल मीडिया प्लॅटफॉर्म वीबोवर शांघाय आणि उरुमकीसारख्या शब्दांवर बंदी घालण्यात आली आहे. जेव्हा तुम्ही वीबोवर शोधासाठी असे शब्द प्रविष्ट करता तेव्हा तुम्हाला सेन्सॉर केलेला शोध दिसेल. आंदोलनापूर्वी असा कीवर्ड टाकल्यावर त्याच्याशी संबंधित लाखो निकाल दिसायचे. झिरो कोविड धोरणा विरोधात सुरू असलेल्या निदर्शनांबद्दल लोकांनी बोलू नये, म्हणून हे केले गेले आहे. यासोबतच वीबोवर कोऱ्या कागदावरही बंदी घालण्यात आली आहे.
साध्या पोशाखात उभे असलेले पोलीस प्रदर्शन करताच लोकांचे अपहरण करत आहे. जे लोक त्याला सोडवण्याचा प्रयत्न करतात किंवा व्हिडिओ बनवतात, त्यांनाही पोलीस थांबवतात. अशा तरुणाला जबरदस्तीने पोलीसव्हॅनमध्ये ढकलतात. यानंतर व्हॅन तरुणाला घेऊन निघून जाते. आतापर्यंत पोलिसांनी अशाप्रकारे डझनभर लोकांचे अपहरण केले आहे. चीनमध्ये झालेल्या निदर्शनांची छायाचित्रे आणि व्हिडिओमध्ये पांढरे कागद हातात धरलेले लोक दिसत आहेत. कागदांवर काहीही लिहिलेले नसल्यामुळे, कोणत्याही टिप्पणीसाठी त्यांना कायद्याने शिक्षा होऊ शकत नाही.
शांघायसारख्या शहरात पोलीस आंदोलकांना घराबाहेर पडू देत नाहीत. कोणत्याही ठिकाणी आंदोलनाची माहिती मिळाल्यास तत्काळ पोलिसांचा मोठा फौजफाटा पोहोचतो. शेकडो एसयूव्ही, व्हॅन आणि चिलखती वाहने शहराच्या रस्त्यांवर रांगेत उभी असतात. पोलीस रस्त्यावरून चालणाऱ्या लोकांचा फोन हिसकावून घेऊन शोध घेतात. यासोबतच सोशल मीडियावरील पोस्टचाही शोध पोलीस घेत आहे.
हॉंगकॉंगमध्ये 2019 च्या मोठ्या निषेधादरम्यान, चीनने अत्यंत आक्रमक कारवाई करून तेथील आंदोलन चिरडले होते. 1987मध्ये तियानान मेन चौकात 10 हजार आंदोलक मारले गेले. गेल्या 33 वर्षांतील देशातील सर्वात मोठा विरोध दडपण्यासाठी चीन सरकार कोणत्याही थराला जायला तयार असल्याचे दिसते.