पिंपरी – एका किराणा मालाच्या दुकानातून आणि घरातून तब्बल 15 किलो 809 ग्रॅम वजनाचा गांजा जप्त करण्यात आला आहे. ही कारवाई अंमली पदार्थ विरोधी पथकाने सोमवारी (दि. 4) दुपारी साडेतीन वाजता बावधन येथे केली. प्रेमसिंग रतनसिंग चंपावत (वय 38, रा. पाटीलनगर, बावधन. मूळ रा. राजस्थान) असे अटक केलेल्या आरोपीचे नाव आहे. याबाबत पोलीस नाईक संतोष भालेराव यांनी मंगळवारी (दि. 5) हिंजवडी पोलीस ठाण्यात फिर्याद दिली आहे.
आरोपी चंपावत याचे बावधन मधील पाटील नगर येथे हिराई निवास बिल्डिंगमध्ये वेलकम सुपर मार्केट नावाचे दुकान आहे. त्याने दुकानात गांजा ठेवला असल्याची माहिती पोलिसांना मिळाली. त्यानुसार पोलिसांनी आरोपी चंपावत याच्या दुकानात आणि घरात छापा मारून 15 किलो 809 ग्रॅम वजनाचा गांजा तसेच मोबाइल फोन, वजनकाटा, प्लास्टिक पिशव्या, गोगो गांजा भरून ओढण्याच्या उपयोगाचे साधन, रोख रक्कम असा एकूण 4 लाख 58 हजार 915 रुपये किमतीचा मुद्देमाल जप्त केला.