कान (फ्रान्स) – ७७ व्या आंतरराष्ट्रीय कान फिल्म फेस्टिव्हलला आजपासून सुरुवात होत आहे. या वर्षीच्या या आंतरराष्ट्रीय चित्रपट महोत्सवामध्ये बारताकडून प्रथमच भारत पर्वचे आयोजन केले जाणार आहे.
या चित्रपट महोत्सवामध्ये सहभागी होण्यासाठी भारतीय पथक फ्रान्सला रवाना झाले आहे. भारतीय शिष्टमंडळात भारत सरकार, राज्य सरकारे आणि चित्रपट उद्योगातील सदस्यांचा समावेश आहे. भारत प्रथमच कान्स फिल्म फेस्टिव्हलमध्ये भारत पर्व आयोजित करणार आहे. कान्स येथील भारत पॅव्हेलियन हे भारतीय चित्रपट समुदायासाठी विविध उपक्रमांमध्ये सहभागी होण्यासाठी एक व्यासपीठ म्हणून काम करेल.
यामध्ये उत्पादन सहकार्य, ज्ञान सत्र, वितरण विषयक करारांवर स्वाक्षऱ्या, व्यवसायिकांमधील बैठका आणि जगभरातील प्रमुख मनोरंजन आणि माध्यम क्षेत्रातील मान्यवरांसह नेटवर्किंग यांचा समावेश आहे. भारत पर्व मध्ये या वर्षीच्या भारतीय आंतरराष्ट्रीय चित्रपट महोत्सवाचे पोस्टर आणि ट्रेलर देखील प्रदर्शित केले जाणार आहे. या वर्षीचा भारतीय आंतरराष्ट्रीय चित्रपट महोत्सव गोव्यामध्ये २० ते २८ नोव्हंबर दरम्यान होणार आहे.