मुंबई- मराठ्यांच्या जीवावर मोठे झालात आणि मराठ्यांच्याच आरक्षणाला विरोध करता, बस झाले, आता यापुढे तुम्हाला आमच्या जीवावर मोठे होऊ देणार नाही. मी जिवंत असेपर्यंत मराठ्यांच्या जिवावर कोणालाच मोठे होऊ देणार नाही. जे आमच्या बाजूने बोलतात. आमच्या गोरगरीब लेकरांच्या कल्याणाचा विचार करतात, त्यांचाच आम्ही देखील विचार करू, असा घणाघात मनोज जरांगे यांनी विरोधकांवर केला. तर कामोठे या ठिकाणी मुंबई डबेवाले असोसिएशनच्या वतीने जरांगे यांना पाठिंबा देण्यात आला.
जरांगे यावेळी बोलताना म्हणाले की, विरोधकांना मी एकटाच काफी आहे, त्यांना मी पुरून उरेल, जो माझ्याविरुद्ध बोलतो त्याच्यात दम असेल तर त्यांनी समोर येऊन दाखवावे, त्याला पुरून उरेल. मला त्याच्या किती दम आहे, हेच पाहायचे आहे, असे म्हणत त्यांनी छगन भुजबळ यांचे नाव न घेता त्यांच्यावर अप्रत्यक्षपणे टीका केली. तर कायद्याच्या अंमलबजावणीसाठी मी १० फेब्रुवारीपासून बेमुदत उपोषणाला बसणार आहे, असेही ते म्हणाले.
सगेसोयरे अद्यादेश पारीत होऊन त्याचे कायद्यात रुपांतर होणार आहेच. त्यासाठी वेळेला जीव गेला तरी चालेल, मेलो तरी बेहत्तर, मराठा समाजाला कायद्याच्या चौकटीत कायमस्वरुपी टिकणारे आरक्षण दिल्याशिवाय मी शांत बसणार नाही, असेही जरांगे म्हणाले.